Eknath Shinde: गृहमंत्रिपद सोडा तुम्हाला ही दोन खाती देतो, शिंदेंसमोर भाजपचा नवा प्रस्ताव? तिढा सुटला?

शपथविधीला अवघे काही तास शिल्लक असल्याने राज्यात राजकीय घडामोडींना मोठा वेग आलेला दिसत आहे. यादरम्यान, एकनाथ शिंदे आणि देवेंद्र फडणवीस यांची बैठक पार पडली. फडणवीसांनी थेट वर्षा बंगला गाठत शिंदेंची भेट घेतली. पाऊण तास या दोन नेत्यांमध्ये बैठक झाली. त्यानंतर राज्याचं गृहखातं हे फडणवीसांकडेच राहणार हे ठरल्याचं सूत्रांच्या माहितीने समोर आलं आहे.

शिंदे-फडणवीसांच्या बैठकीतही मंत्रिपदाचा तिढा काही सुटलेला दिसत नाही. त्यामुळे आज बुधवारी पुन्हा बैठक होण्याची शक्यता आहे. गृहमंत्रिपद हे फडणवीसांकडे राहावं अशी भाजपची इच्छा आहे. त्याबदल्यात शिंदेंना उपमुख्यमंत्रिपद आणि त्यासह नगरविकास खातं आणि आणखी एक खात्याची ऑफर दिल्याची सूत्रांची माहिती आहे. तसा प्रस्ताव एकनाथ शिंदेंपुढे ठेवण्यात आला आहे. आता यावर शिंदे काय निर्णय घेतात हे अद्याप समोर आलेलं नाही.

शपथविधी सोहळा आता काही तासांवर आला आहे. त्यामुळे आज मंत्रिपदाच्या तिढ्यावर आज निर्णय होणे अपेक्षित आहे. दरम्यान, भाजपकडून आज विधीमंडळ पक्षाच्या बैठकीत मुख्यमंत्रिपदाच्या नावावर शिक्कामोर्तब होणार आहे.

शपथविधी सोहळ्याला कोण-कोण आमंत्रित?

५ डिसेंबरला महायुती सरकारच्या मुख्यमंत्रिपदाचा शपथविधी पार पडणार आहे. त्यासाठी मुंबईच्या आझाद मैदानावरील तयारी अखेरच्या टप्प्यात आहे. या शपथविधी सोडळ्यासाठी अनेक बड्या नेत्यांना आमंत्रण पाठवण्यात आलं आहे. यामध्ये शिवसेना ठाकरे गटाचे प्रमुख उद्धव ठाकरे यांनाही आमंत्रण देण्यात आलं आहे. त्याशिवाय, उत्तर प्रदेशचे मुख्यमंत्री योगी आदित्यनाथ, नितीशकुमार, प्रमोद सावंत, भूपेंद्र पटेल यांनाही आमंत्रित करण्यात आलं आहे.