अकोला हादरलं; रॉन्ग साईडने येणाऱ्या दुचाकीला वाचवायला गेला, डिव्हायरला धडकून वाहन पलटी अन्…

मंगळवारी (३ डिसेंबर) रात्री १० वाजताच्या सुमारास अकोला शहरात अपघात झाल्यानंतर आज सकाळी पुन्हा नऊ वाजताच्या दरम्यान पुन्हा एक अपघात झाला. अकोला-वाशीम रोडवरील हिंगणा फाट्याजवळ एका चार चाकी आणि मालवाहू वाहनात अपघात झाला. जखमींना तात्काळ सर्वोच्च रुग्णालयात दाखल करण्यात आले. या अपघातामध्ये चारचाकी वाहनाचा चालक गंभीर जखमी झाला, तर दुचाकी चालकाचा मृत्यू झाला आहे.

अकोल्याकडून वाशीमकडे कलर पेंट घेऊन जाणाऱ्या मालवाहू चारचाकी वाहनासमोर विरुद्ध दिशेने भरधाव वेगाने दुचाकी येताना चालकाला दिसली, रॉन्ग साइडने येणाऱ्या दुचाकीला वाचवण्याच्या प्रयत्नात मालवाहू चारचाकी दुभाजकावर आदळून चारचाकी वाहन पलटी झाले. गाडी पलटी झाल्याने वाहनातील कलर पेंट रस्त्यावर पडल्याने मोठं नुकसान झालं. दरम्यान रॉन्गसाईड येणारी दुचाकी चारचाकीवर धडकल्याने दुचाकीचाही भीषण अपघात झाला, या धडकेत पातूर तालुक्यातील सायवनी या गावचे रहिवासी सुधीर मनोहर टाले यांचा रुग्णालयात नेताना मृत्यू झाला. तर चारचाकी चालक गंभीर जखमी झाला आहे, त्याला खासगी रुग्णालयात दाखल करण्यात आले आहे.

या मार्गावर मोठ्या अंतरापर्यंत दुभाजक लावले असल्याने , दुचाकीचालक अनेकवेळा रॉन्गसाईड वाहने चालवतात, त्यामुळे या मार्गावर नेहमीच अपघात घडत असतात. अनेकवेळा दुचाकी चालकांना फेरा वाचवण्याच्या नादात जीवही गमवावा लागतो, त्यामुळे संबंधित विभाग आणि पोलीस प्रशासनाने या गंभीर बाबीकडे लक्ष देण्याची गरज आहे. रॉन्गसाईड जाणाऱ्या वाहनांना रोखल्यास अपघाताचे प्रमाण कमी होण्याची शक्यता आहे.