डोक्यात, पोटावर, छातीवर सपासप वार, सुनिता जागीच कोसळल्या, मग आरोपीने… पुणे जिल्हा हादरला

सदरची घटना इंदापूर तालुक्यातील निमगाव केतकी येथील सराफवाडी रोडवरील पत्र्याच्या शेडखाली बुधवारी (४ डिसेंबर) सायंकाळी घडली. या खून प्रकरणी इंदापूर तालुक्यातील सुरवड येथील आरोपी ज्ञानेश्वर बबन रासकर (रा. सुरवड ता. इंदापुर जि.पुणे ) याच्यावर इंदापूर पोलिसांनी गुन्हा दाखल केला असून, त्याला अटक करण्यात आली आहे.

मृत महिला जानाई लक्ष्मी महिला सहकारी पतसंस्थेच्या अध्यक्षा होत्या

मृत विवाहित सुनिता शेंडे या जानाई लक्ष्मी महिला सहकारी पतसंस्थेच्या अध्यक्षा असुन समता परिषदेचे माजी जिल्हाध्यक्ष दादासाहेब शेंडे यांच्या त्या पत्नी आहेत. त्यांचा खून झाल्याने तालुक्यात खळबळ माजली आहे.सदरच्या खुणाबाबतचे कारण अद्याप स्पष्ट झाले नसून, इंदापूर पोलीस या घटनेचा अधिकचा तपास करीत आहेत.

आरोपी स्वतःहून पोलीस ठाण्यात हजर

ही घटना बुधवारी रात्री इंदापुरातील निमगाव केतकी सराफवाडी रोडवरील पत्र्याच्या शेडखाली घडली. यावेळी आरोपीने सुनिता शेंडे यांच्या डोक्यात, पोटावर, छातीवर, हातावर चाकूने वार केले. या हल्ल्यात सुनिता शेंडे यांचा जागीच मृत्यू झाला. घटनेनंतर आरोपी रासकर हा स्वतःहून पोलीस ठाण्यात हजर राहिल्याची माहिती मिळत आहे. सदर घटनेचा तपास पोलीस निरीक्षक सूर्यकांत कोकणे यांच्या मार्गदर्शनाखाली फौजदार गावडे करत आहेत.