देवेंद्र फडणवीस नव्या पुण्याचे शिल्पकार; होर्डिंगमुळं भाजप ट्रोल

पुणेः सोशल मीडियावर होणारं ट्रोलिंग हा नेहमीच चर्चेचा विषय ठरतो. कलाकारांबरोबर राजकारणाऱ्यांनीही ट्रोल करण्याचे प्रमाण वाढले आहे. महाराष्ट्राचे माजी मुख्यमंत्री व विरोधी पक्षनेते देवेंद्र फडणवीस यांच्यासोबतही असाच प्रकार घडला आहे. पुण्यात देवेंद्र फडणवीस यांच्या वाढदिवसाचे मोठे होर्डिंग लावले होते. त्यातील एका होर्डिंगची सोशल मीडियावर चर्चा रंगली आहे.

२२ जुलै रोजी देवेंद्र फडणवीसांचा वाढदिवस आहे. त्यानिमित्ताने पुण्यात होर्डिंग लावण्यात आले होते. या हॉर्डिंगवर नव्या पुण्याचे शिल्पकार म्हणून फडणवीस यांच्या नावाचा उल्लेख केला आहे. त्यामुळं भाजपला ट्रोल करण्यात येत आहे. हीच संधी साधत राष्ट्रवादीनंही निशाणा साधला आहे.

वाचाः मुंबईत भररस्त्यात वकिलावर तलवारीने हल्ला; तिघांना अटक

राष्ट्रवादीचे आमदार अमोल मिटकरी यांनी या होर्डिंगचा फोटो शेअर केला आहे. आता कमाल झाली. चक्क पुण्याचे शिल्पकार. मला वाटतं यापेक्षा दुसरा मोठा जोक असू शकत नाही. धन्य ते नेतृत्व आणि त्यांचे अंधभक्त, असा टोला मिटकरींनी लगावला आहे.

वाचाः …. म्हणून रोहित पवारांनी मानले मोदी सरकारचे आभार

दरम्यान, राष्ट्रवादी काँग्रेसकडून यंदा फडणवीसांच्या वाढदिवसानिमित्त कार्यकर्त्यांना कोणतीही बॅनरबाजी न करण्याचे आवाहन करण्यात आले आहे. पक्षाचे कोणतेही नेते, कार्यकर्ते होर्डिंग, बॅनर लावणार नाहीत आणि वृत्तपत्रातून/ टीव्ही माध्यमातून जाहिराती प्रसिद्ध करु नये, असे आवाहन भारतीय जनता पक्षातर्फे करण्यात आल्याचे भाजपाचे कार्यालय सचिव मुकुंद कुळकर्णी यांनी सांगितलं आहे. होर्डिंग, बॅनर, जाहिराती कुणी केल्यास त्याची पक्षातर्फे गंभीर दखल घेतली जाईल, असंही त्यांनी म्हटलं आहे.