गोरेगावातील २२ मजली इमारत, रात्री २.१५ वाजता धप्पकन् आवाज झाला, रहिवाशांनी पाहिलं तर…

मुंबई : गोरेगाव पश्चिम येथील लक्ष्मीनगर परिसरातील गुलराज टॉवरच्या परिसरात बुधवारी एका अज्ञात महिलेचा मृतदेह आढळला. बांगूर नगर पोलीस मृत महिलेची ओळख पटवण्याचा प्रयत्न करत असून, ती अंदाजे ४५ वर्षांची असल्याचे दिसत आहे.

पोलीस सूत्रांनी दिलेल्या माहितीनुसार, आज पहाटे २.१५ वाजताच्या सुमारास गुलराज टॉवरच्या रहिवाशांना मोठा आवाज आला. त्यांनी बाहेर धाव घेतली तेव्हा मॅक्सी घातलेली एक महिला रक्ताच्या थारोळ्यात पडलेली दिसली. मृत महिलेचे डोके आणि चेहरा दाबले गेल्याने रहिवाशांना तिची ओळख पटू शकली नाही. तसेच मृतदेह सापडलेल्या ठिकाणी सीसीटीव्ही कॅमेरा नव्हता.

महिलेने आत्महत्या केली की तिला कोणीतरी इमारतीवरून ढकलून मारले, हे माहिती नसल्याचे रहिवाशांनी सांगितले. पोलिसांना माहिती मिळाल्यानंतर एक पथक घटनास्थळी दाखल झाले. पंचनामा केल्यानंतर मृतदेह शवविच्छेदनासाठी पाठवण्यात आला, असे बांगूर नगर पोलिस स्टेशनच्या अधिकाऱ्याने सांगितले.

आम्ही इमारतीचा डिजिटल व्हिडिओ रेकॉर्डर जप्त केला असून अपघाती मृत्यूची नोंद केली आहे, असे बांगूर नगर पोलिस स्टेशनच्या अधिकाऱ्याने सांगितले.

संबंधित २२ मजली उंच इमारत ही एसआरए प्रकल्पाअंतर्गत बांधण्यात आलेली आहे. यामध्ये 500 पेक्षा जास्त फ्लॅट आहेत आणि बहुतेक रहिवासी तेथे भाड्याने राहतात. येथील एका रहिवाशा टॉवरला ओसी (ऑक्युपन्सी सर्टिफिकेट किंवा भोगवटा प्रमाणपत्र) मिळाले नसल्याचा आरोप केला.

बिल्डर किंवा समिती इमारतीची काळजी घेत नाही. हा समाजविघातक कृत्य करणाऱ्या लोकांचा अड्डा बनला आहे, असा आरोपही एका रहिवाशाने केल्याचं वृत्त ‘मिड-डे’ने दिलं आहे. १७, १८ आणि १९ व्या मजल्यावरील रिकाम्या फ्लॅटमध्ये बाहेरील लोक दारू पिताना पाहिल्याचं त्याने सांगितलं. इमारतीच्या देखभालीसाठी जबाबदार असलेल्या लोकांनी त्यांच्या नातेवाईकांना आणि बाहेरील लोकांना फ्लॅट भाड्याने दिल्याचा रहिवाशाचा दावा आहे. आम्ही तक्रार केली असता पोलिस पडताळणी केल्याचं सांगितलं जात असल्याचंही या रहिवाशाने सांगितलं.

हेही वाचा : एकाच तरुणीशी दोघा शेजाऱ्यांची जवळीक, वादातून तुंबळ हाणामारी, विवाहित तरुणाने जीव गमावला

काही फ्लॅटमध्ये वेश्याव्यवसाय होत असल्याची माहिती आम्हाला मिळाली आहे. अज्ञात व्यक्ती रात्री उशिरा इमारतीत घुसून उपद्रव निर्माण करतात. बांगूर नगर पोलिसांत दोन तक्रारींची नोंद करण्यात आली आहे. टॉवरमध्ये राहणाऱ्या प्रत्येक व्यक्तीची किमान पडताळणी करावी, अशी मागणी अन्य रहिवाशाने केली.

हेही वाचा : सहा पोरांच्या बापाचे तरुणीला आमिष, लग्नाच्या वचनाने संबंध, तीन मुलांच्या जन्मानंतर सत्य उघड