धनंजय देसाईसह सगळेच आरोपी निर्दोष मग मोहसीन शेखला कुणी मारलं? मौलवींचा सवाल

सोलापूर: आयटी इंजिनिअर मोहसीन शेख याचा जून २०१४ मध्ये खून झाला होता. सोशल मीडियावर छत्रपती शिवाजी महाराजांबाबत वादग्रस्त पोस्ट व्हायरल झाल्यानंतर पुणे येथे जून २०१४ मध्ये दंगल उसळली होती. आयटी इंजिनिअर मोहसीन शेख हा जेवण करून नमाजला जात असताना, एका जमावाने त्याला बॅटने व इतर साहित्यानं मारहाण केली होती. या मारहाणीत मोहसीनचा मृत्यू झाला होता. त्याबद्दल पुणे कोर्टाचा निर्णय आला असून, सर्व संशयितांना पुराव्याअभावी निर्दोष सोडण्यात आले आहे. न्यायालयाच्या निर्णयावर सोलापूर जमियत-ए-उलेमाचे अध्यक्ष मौलाना इब्राहिम जाहुरकर यांनी नाराजी व्यक्त केली आहे. पुणे कोर्टाने आज निर्णय दिलाय. पण आम्ही हायकोर्ट आणि सुप्रीम कोर्टात न्याय मागू. नमाजला जाणाऱ्या निष्पाप मोहसीनची हत्या करण्यात आली. हिंदू राष्ट्र सेनेच्या सर्व संशयितांना निर्दोष सोडलं, मग मोहसीन शेख याचे मारेकरी कोण? त्याला नेमकं कुणी मारलं? असा सवाल मौलाना इब्राहिम यांनी उपस्थित केलाय.

संपूर्ण देशभरात गाजलेल्या पुण्यातील अभियंता मोहसीन शेख हत्या प्रकरणातील सर्व आरोपींची पुराव्याअभावी निर्दोष मुक्तता करण्यात आली आहे. या प्रकरणी हिंदू राष्ट्र सेनेचा प्रमुख धनंजय देसाईसह वीस जणांवर हत्येचा आरोप होता. पुणे सत्र न्यायालयाने आज या आरोपातून धनंजय देसाईसह सगळ्यांची निर्दोष मुक्तता केलीये. पुण्यातील एका आयटी कंपनीत काम करणाऱ्या मोहसीन शेखची जमावाने २ जून २०१४ रोजी हत्या केली होती. याप्रकरणी पोलिसांनी हिंदू राष्ट्र सेनेचा प्रमुख धनंजय देसाईसह २१ जणांना येरवड्यातून अटक केली होती. हडपसरमध्ये दोन जून २०१४ला दंगल उसळली होती. यात मोहसीन शेखचा मृत्यू झाला होता.

मोहसीनच्या कुटुंबाला घेऊन उच्च न्यायालयात जाणार

जमियत-ए-उलेमा या संघटनेच्या मौलाना इब्राहिम जाहुरकर यांनी कोर्टाच्या निर्णयावर नाराजी व्यक्त करताना मोहसीनच्या कुटुंबाला घेऊन उच्च न्यायालयात जाणार असल्याचं सांगितलं. पुणे कोर्टावर मोठा विश्वास होता. मोहसीनच्या संशयित मारेकऱ्यांना शिक्षा होईल, अशी आम्हाला आशा होती. पण त्यांना निर्दोष सोडण्यात आलं. मोहसीनच्या कुटुंबाच्या पदरी निराशा पडलीये. आता आम्हाला सगळ्यांना प्रश्न पडलाय की मोहसीनची हत्या नेमकी कुणी केली? असा सवाल जमियत-ए-उलेमाने केला आहे.