SSC HSC Exam: एकाच दिवशी दोन पेपरमुळे विद्यार्थ्यांची होणार धावाधाव

रविवारी अनेक शिक्षणाधिकाऱ्यांनी केंद्रप्रमुखांच्या बैठका घेत आढावा घेतला. परीक्षेत आठ मार्चला बारावीचा जीवशास्त्र तर दहावीचाही हिंदी विषयाचा पेपर आहे. सकाळी ११ वाजता पेपर सुरू होणार आहे. मंडळाने ‘एका बाकावर एक विद्यार्थी’, ‘एका परीक्षा कक्षात २५ विद्यार्थी’ अशी बैठक व्यवस्था निश्चित केली आहे. दोन्ही पेपर एकत्रित आल्याने दहावी, बारावी अशा दोन्ही परीक्षेसाठी केंद्र असलेल्या अनेक केंद्रावर बैठक व्यवस्थेचे नियोजन बिघडण्याची शक्यता आहे. छत्रपती संभाजीनगर विभागात शिक्षण मंडळाने निश्चित केलेल्यापैकी २०५ केंद्र दहावी, बारावी अशा दोन्ही परीक्षांसाठी आहेत. अशा केंद्रप्रमुखांची बैठक घेत विद्यार्थ्यांची गैरसोय होणार नाही, याबाबत खबरदारी घेतली जात आहे, परंतु अनेक केंद्रावर नियोजन बिघडेल, विद्यार्थ्यांची गैरसोय होण्याची शक्यता व्यक्त केली जात आहे.

मुख्याध्यापकांनी वेधले होते लक्ष

शिक्षण मंडळाकडून विभागीय पातळीवर जिल्हास्तरावर परीक्षेच्या अनुषंगाने बैठका घेण्यात आल्या. यातही हा प्रश्न उपस्थित झाला. मुख्याध्यापक संघटनेने याबाबत मंडळाला पत्र लिहले होते. बारावी विज्ञान शाखेचा जीवशास्त्र व इयत्ता दहावीचा द्वितीय व तृतीय भाषा हिंदी विषयाची सकाळी ११ ते २.१० या वेळेतच परीक्षा आहे. राज्य मंडळाशी संलग्न बऱ्याच शाळेत दहावी, बारावीचे दोन्ही परीक्षा केंद्र असल्यामुळे या परीक्षा केंद्रांना हॉल उपलब्धता, बैठक व्यवस्था अशा समस्यांना सामोरे जावे लागेल. त्यामुळे सदर परीक्षा केंद्रावर गोंधळाची स्थिती निर्माण होण्याची शक्यता नाकारता येत नाही, असे मुख्याध्यापकांनी म्हटले होते.

दहावी, बारावी दोन्हीसाठी परीक्षा केंद्र असलेली संख्या.. २०५

दहावी हिंदी विद्यार्थी १ लाख ६० हजार

बारावी जीवशास्त्र विद्यार्थी ६० हजार

दहावी, बारावीचा आठ मार्चला पेपर एकाच वेळी येत आहे. काही केंद्र दहावी, बारावीसाठी एकत्रित आहेत. अशावेळी तेथील सोयीसुविधांचा आढावा, नियोजनाबाबत शिक्षणाधिकाऱ्यांची बैठक घेण्यात आली. विद्यार्थ्यांची गैरसोय होणार नाही, याबाबत तातडीने उपाययोजना करण्याचे निर्देश दिले. नियोजनाबाबत दक्ष राहण्याच्या सूचना देण्यात आल्या. एका बाकावर एक विद्यार्थी अशी बैठक व्यवस्था असेल.
विजय जोशी, विभागीय सचिव, माध्यमिक व उच्च माध्यमिक शिक्षण मंडळ, छत्रपती संभाजीनगर

जिल्ह्यात दहावी, बारावी दोन्हीसाठी केंद्र असलेली संख्या ७१ आहे. या सर्व केंद्रप्रमुखांना एका बाकावर एक विद्यार्थी अशी बैठक व्यवस्था याबाबत सूचना केलेल्या आहेत. काही केंद्रांना जवळच्या जिल्हा परिषदेची, इतर शाळा उपकेंद्र म्हणून देण्यात आले आहे. त्यामुळे अडचणी नसल्याचेही केंद्रप्रुखांनी कळविले आहे.
मधुकर देशमुख, शिक्षणाधिकारी, छत्रपती सभांजीनगर

जालना जिल्ह्यात ४१ अशी केंद्र आहेत, जेथे दहावी आणि बारावीचे एकत्रित केंद्र आहे. त्यांची रविवारी बैठक घेत त्यांना मंडळाच्या सूचना सांगण्यात आल्या. बैठक व्यवस्थेचे नियोजनाबाबत त्यांच्या अडचणी जाणून घेतल्या. एका बाकावर एक विद्यार्थी असे नियोजन असावे असे सांगितले. शिक्षणाधिकारी कार्यालयही याबाबत लक्ष ठेवून आहे.
मंगल धुपे, माध्यमिक शिक्षणाधिकारी, जालना.

शिक्षण मंडळ, शिक्षणाधिकाऱ्यांनी बैठक घेऊन बैठक व्यवस्थेबाबत सुचना दिल्या. आम्ही आमच्या पातळीवर नियोजन केले. काही बाकडे कमी पडले तर इतर शाळेतून आणले, वर्ग खोल्यांचेही विद्यार्थी संख्येच्या तुलनेत नियोजन केले.
एस. बी. मोहिते, केंद्रप्रमुख, जिल्हा परिषद उच्च माध्यमिक शाळा, लाडसावंगी.