Tej Police Times
हायलाइट्स:
- विवाहित प्रेयसीची घरात घुसून हत्या
- आरोपीविरोधात पोलिसांनी दाखल केला गुन्हा
- धक्कादायक घटनेनं चंद्रपूरमध्ये खळबळ
नवऱ्यापासून विभक्त झाल्याने पूजा सलामे ही माहेरी आपल्या आईकडे राहत होती. त्यावेळी पूजाचे परिसरातील एका युवकाशी प्रेमप्रकरण सुरू झाले. मात्र याच प्रियकराने पूजाच्या घरी जात तिच्या गळ्यावर चाकूने हल्ला केला. यामध्ये पूजा सलामे हिचा जागीच मृत्यू झाला. सदर घटना नागभीड येथे शनिवारी सकाळी साडेदहा वाजता घडली.
मृतक विवाहित महिला २७ वर्षीय पूजा रवींद्र सलामे हिचा विवाह येथील निलकुमार बागडे नामक युवकासोबत झाला होता. मात्र विभक्त असल्याने ती नागभीड येथे चौंडेश्वरी वार्डात आईकडे राहत होती. तिचे चिखल परसोडी येथील २५ वर्षीय युवक विवेक ब्रह्मदास चौधरी सोबत पूजाचे प्रेमसंबध जुळले. मात्र पूजा व विवेक यांचे काही कारणावरून अलीकडे भांडण होत होते.
याच भांडणाचा राग काढण्यासाठी विवेक शनिवारी सकाळी पूजाच्या घरी आला. त्यावेळी पूजाची आई घराबाहेर गेली असल्याने विवेकने या संधीचा फायदा घेत पूजाच्या गळ्यावर चाकूने वार केले. अचानक झालेल्या हल्ल्यात पूजाचा जागीच मृत्यू झाला. याबाबत पोलीस सूत्रांनी माहिती दिली आहे.
दरम्यान, आरोपीने पोलीस स्टेशनमध्ये जाऊन गुन्हा कबूल केला आहे. याप्रकरणी गुन्हा नोंदविण्यात आला असून पुढील तपास नागभीड पोलीस करत आहेत.