रत्नागिरी जिल्ह्यातही डेल्टा प्लसचे १५ रुग्ण आढळले; आरोग्य विभागाची माहिती

रत्नागिरी : रत्नागिरी जिल्ह्यात डेल्टा प्लस या करोना व्हेरिएंटचे एकूण १५ रुग्ण आढळले आहेत. तसंच दोन रुग्णांचा मृत्यू झाला आहे. एका रुग्णाचा उपचारादरम्यान रत्नागिरी येथील वुमन्स हॉस्पिटल येथे मृत्यू झाला आहे, तर दुसऱ्या रुग्णाचा मुंबई येथील सेंट जॉर्ज रुग्णालयात उपचार सुरू असताना मृत्यू झाला आहे. परंतु सदर रुग्णाचा पत्ता हा रत्नागिरीचा असल्यामुळे त्याची नोंद जिल्ह्यामध्ये घेण्यात आली आहे.

रत्नागिरी जिल्ह्यामध्ये आढळलेल्या डेल्टा प्लस बाधित रुग्णांमधील सर्व रुग्ण संगमेश्वर तालुक्यातील आहेत, अशी माहिती आरोग्य विभागाने दिली आहे. यापैकी नवीन ३ रुग्णांची माहिती रविवारी राज्य स्तरावरून कळवण्यात आली आहे. हे तीन रुग्ण जुलै २०२१ मध्ये कोविड बाधित म्हणून रत्नागिरी जिल्ह्यामध्ये उपचार घेत होते. यातील दोन रुग्ण आंगवली आणि एक रुग्ण धामणी येथील आहेत. हे तीनही रुग्ण उपचाराअंती पूर्णपणे बरे झाले आहेत, अशी माहिती जिल्हा आरोग्य विभागाकडून देण्यात आली आहे.

mumbai corona latest updates करोना: मुंबईकरांना मोठा दिलासा; पाहा, मुंबई-ठाण्यात ‘अशी’ आहे ताजी स्थिती!

कोल्हापूरमध्येही आढळले डेल्टा प्लसचे रुग्ण

रविवारी आलेल्या अहवालानुसार कोल्हापूर जिल्ह्यातील सहा करोनाबाधित रूग्णांच्या शरीरात डेल्टा प्लसचे विषाणू असल्याचे स्पष्ट झाले. यामुळे जिल्ह्यात एकच खळबळ उडाली आहे. यामध्ये कोल्हापूर शहरात तीन, हातकणंगले तालुक्यात दोन तर करवीर तालुक्यातील एका रूग्णाचा समावेश आहे. शहरात सापडलेला एक रूग्ण विचारे माळ तर दोन रूग्ण साने गुरूजी वसाहत परिसरातील आहेत. विशेष म्हणजे त्यांचा अहवाल रविवारी आला असला तरी हे सर्व रूग्ण यापूर्वीच बरे झालेले आहेत. त्यामुळे कोणीही घाबरून जाऊ नये, असं आवाहन प्रशासनाने केलं आहे.

दरम्यान, ज्या भागात डेल्टा प्लसचे रूग्ण सापडले आहेत, त्या भागात तातडीने नागरिकांची तपासणी करण्याचे आदेश देण्यात आले आहेत. महापालिका, जिल्हा परिषदेसह आरोग्य विभागाची यंत्रणा गतीमान झाली आहे.