‘शिवसेनेला भुजबळ, भास्कर जाधव चालतात, पण नारायण राणेंना विरोध?’

मुंबई: केंद्रीय मंत्रिपदी वर्णी लागलेले भाजपचे नेते नारायण राणे यांची जन आशीर्वाद यात्रा मुंबईतून सुरू झाली आहे. पूर्वाश्रमीचे शिवसैनिक असलेले राणे हे शिवाजी पार्क येथील बाळासाहेब ठाकरे यांच्या स्मृती स्थळाला देखील वंदन करणार असल्याचं समजतं. शिवसैनिकांनी राणेंना स्मृती स्थळी येऊ देण्यास विरोध दर्शवला आहे. त्यावरून भाजपनं शिवसेनेवर जोरदार हल्ला चढवला आहे.

वाचा: LIVE उद्धव ठाकरे राज्याला उद्ध्वस्त करायला निघालेत – राणे

भाजपचे मुख्य प्रवक्ते केशव उपाध्ये यांनी एक ट्वीट करून शिवसेनेला सवाल केले आहेत. ‘बाळासाहेबांनी ज्या काँग्रेसवर टीका केली, त्या काँग्रेसच्या वळचणीला सत्तेसाठी बसता येतं, बाळासाहेबांना अटक करणारे, त्यांच्याबद्दल वाईट शब्द वापरणारे छगन भुजबळ आता शिवसेनेला गोड झालेत, शिवसेना सोडणारे भास्कर जाधव हे देखील चालतात, पण बाळासाहेबांना वंदन करायला येणारे नारायण राणे यांना विरोध केला जातो. ही शिवसेनेची कुठली भूमिका आहे,’ असं सवाल उपाध्ये यांनी केला आहे. ‘बाळासाहेब ठाकरे हे मोठे नेते होते. त्यांना संकुचित करू नका,’ असा टोला त्यांनी शिवसेनेला हाणला आहे.
वाचा: पुण्यातील ‘त्या’ मंदिरातून मोदींचा पुतळा रातोरात गायब; नेमकं काय घडलं?

वांद्रे पूर्व विधानसभा मतदारसंघात नारायण राणे यांचा पराभव करणाऱ्या व कालांतरानं भाजपवासी झालेल्या माजी आमदार तृप्ती सावंत यांनीही शिवसैनिकांच्या भूमिकेबद्दल नाराजी व्यक्त केली आहे. ‘बाळासाहेब हयात असते तर त्यांना शिवसैनिकांचं हे वागणं अजिबात आवडलं नसतं. बाळासाहेब हे प्रत्येक शिवसैनिकाचं दैवत आहे. आमचं आणि बाळासाहेबांचं नातं अतूट आहे, ते कधीच संपणार नाही. आम्ही शिवसेनेपासून दुरावलो असलो तरी बाळासाहेबांपासून कधीही दुरावणार नाही. जुना शिवसैनिक मोठा होतोय, याचं खरंतर स्वागत व्हायला हवं,’ असं तृप्ती सावंत यांनी म्हटलं आहे.