बाळासाहेबांना अभिवादन करताना नारायण राणे भावुक, म्हणाले…

मुंबई: केंद्रीय मंत्री नारायण राणे यांनी आज शिवाजी पार्क येथील स्मृती स्थळी जाऊन शिवसेनाप्रमुख दिवंगत बाळासाहेब ठाकरे यांना अभिवादन केलं. त्यानंतर पत्रकारांशी बोलताना राणे काहीसे भावुक झाले. ‘मला आशीर्वाद द्यायला बाळासाहेब आज हवे होते,’ अशा भावना राणे यांनी यावेळी व्यक्त केल्या. (Narayan Rane Visits Balasaheb Thackeray National Memorial at Shivaji Park)

‘मंत्रीपद मिळाल्यानंतर दीड महिन्यानंतर मी मुंबईत आलोय. पुढील काही दिवस जन आशीर्वाद यात्रा काढणार आहे. विमानतळावर मला मिळालेला जनतेचा प्रतिसाद पाहून भारावून गेलो आहे. त्याबद्दल मी लोकांचे आभार मानतो. माझ्या खात्याच्या माध्यमातून महाराष्ट्रातील जनतेची कामं करण्याचा प्रयत्न करीन. रोजगार उपलब्ध करून देण्याचा प्रयत्न करेन,’ असं राणे म्हणाले.

वाचा: LIVE ‘उद्धव ठाकरे राज्याला उद्ध्वस्त करायला निघालेत’

‘बाळासाहेबांसमोर नतमस्तक झालो. मला आशीर्वाद द्यायला बाळासाहेब आज हवे होते. मला आयुष्यात जे काही मिळालंय ते साहेबांमुळंच. साहेबांमुळंच मी घडलोय,’ असं राणे म्हणाले. ‘आज साहेब असते तर मला म्हणाले असते तर डोक्यावर हात ठेवून मला आशीर्वाद दिला असता. ‘नारायण, तू असंच यश मिळव’ असं म्हणाले असते. आज ते नसले तरी त्यांचा आशीर्वाद माझ्या पाठीशी आहे असं मी समजतो,’ असंही राणे म्हणाले.

उद्धव ठाकरेंना टोला

नारायण राणे यांना बाळासाहेबांच्या स्मृतीस्थळी जाण्यापासून रोखण्याचा इशारा खासदार विनायक राऊत यांनी दिला होता. त्यावरही नारायण राणे यांनी यावेळी टिप्पणी केली. ‘कोणत्याही व्यक्तीचं, महापुरुषाच्या स्मारकावर नतमस्तक होण्यापासून कोणी कोणाला रोखू नये असं माझं मत आहे. आणि कोणाच्या मनात तसं असेल तर स्वत: स्पष्ट बोलावं. डाव्या उजव्यांना सांगून काही फायदा नाही,’ असा टोला त्यांनी उद्धव ठाकरे यांचं नाव न घेता हाणला. ‘जशास तसं उत्तर देण्याची माझी ख्याती आहे हे सर्वांना माहीत आहे,’ असंही ते म्हणाले.

वाचा: ‘शिवसेनेला भुजबळ, भास्कर जाधव चालतात, नारायण राणेंना विरोध का?’