सोलापूरात राष्ट्रवादी काँग्रेसचा मास्टर प्लॅन, २ तारखेला शरद पवारांचा दौरा

सोलापूर : आगामी महानगरपालिका निवडणुकीच्या तोंडावर सोलापूरात राष्ट्रवादी काँग्रेसने बाह्य सावरल्या असून मित्रपक्ष काँग्रेस आणि शिवसनेबरोबरच प्रमुख विरोधक असलेल्या भाजपशी निकराची लढाई करण्यासाठी रणनीती आखली जात आहे. त्याची मुहूर्तमेढ रोवण्यासाठी खुद्द राष्ट्रवादी काँग्रेसचे सर्वेसर्वा शरद पवार हे २ सप्टेंबरला सोलापूर दौऱ्यावर येत आहेत.

पवारांच्या या दौऱ्यात दुसऱ्या फळीतल्या पण ताकदीच्या नेत्यांच्या हातात आता घड्याळ बांधण्यात येणार आहे. त्यासाठी सोलापूरचे पालकमंत्री दत्तात्रय भरणे यांनी यापूर्वीच साखर पेरणी करत शिवसेनेचे जिल्हाप्रमुख आणि माजी महापौर महेश कोठे, एमआयएमचे नेते तौफिक शेख आणि वंचित बहुजन आघाडीचे प्रदेश प्रवक्ते आनंद चंदनशिवे यांना गळाला लावलं आहे. या तिन्ही नेत्यांना महानगरपालिकेच्या निवडणुकीत मैदान मारण्याचा दांडगा अनुभव आहे.
जातीनिहाय जनगणना: रोहित पवारांनी दिलं बिहारचं ‘हे’ उदाहरण
भाजपच्या लाटेतही सोलापूर महानगरपालिकेत आज महेश कोठे यांच्या गटाचे १४ नगरसेवक आहेत, तर तौफिक शेख यांच्या नेतृत्वाखाली एमआयएमचे ९ आणि आनंद चंदनशिवे यांनी कामाच्या जीवावर वंचितला ४ नगरसेवक मिळवून दिले आहेत. शिवाय गत विधानसभा निवडणुकीत थोड्याबहुत फरकाने यांचा पराभव झालेला आहे. त्यामुळं दुसऱ्या क्रमांकावरील मासबेस लीडरशिप पुढे आणून आगामी महानगरपालिके बरोबरच २०२४ च्या लोकसभा आणि विधानसभा निवडणुकीत करिष्मा करता येईल असेही आडाखे राष्ट्रवादीच्या नेतृत्वाने लावले आहेत. त्याची पर्व तयारी म्हणून कोठे, शेख आणि चंदनशिवे यांना पक्ष प्रवेश देण्यासाठी खुद्द शरद पवार हे २ सप्टेंबरला सोलापूरात येत आहेत.

पवारांच्या दौऱ्यात घड्याळ हाती बांधणाऱ्यामध्ये महेश कोठे आणि तौफिक शेख हे मूळचे काँग्रेसचे जेष्ठ नेते सुशीलकुमार शिंदे यांच्या तालमीतले पैलवान आहेत. तर बसपा, वंचित मार्गे राष्ट्रवादीच्या उंबरठ्यावर पोहचलेल्या आनंद चंदनशिवे यांची लोकसभा निवडणुकीत शिंदे यांना मूक मदत असायची. त्यामुळे या तिन्ही नेत्यांच्या पक्षप्रवेशाचा सर्वाधिक फटका खऱ्या अर्थाने काँग्रेसला बसणार आहे.

पर्यायाने माजी केंद्रीय गृहमंत्री सुशीलकुमार शिंदे आणि त्यांच्या कन्या आमदार प्रणिती शिंदे यांच्या आगामी निवडणुकांत स्थानिक पातळीवर अडचणी वाढणार आहेत ही काळ्या दगडावरची पांढरी रेघ आहे.
‘बावचळलेले संजय राऊत आता भोकं पडलेल्या फुग्याला एवढे का घाबरत आहेत?’