मध्य प्रदेशातून विदर्भात शस्त्रतस्करी, देशीकट्ट्यांचा अवैध कारखाना, अंबाबरवा अभयारण्यातून छुपा मार्ग

गजानन धांडे, बुलढाणा: जिल्ह्याच्या संग्रामपूर तालुक्यात अवघ्या पाच ते सात किलोमीटर अंतरावर मध्य प्रदेशची सीमा लागते. याच सीमाभागात पाचोरी हे अवैध शस्त्रविक्रीचे केंद्र आहे. या गावात देशीकट्ट्यांचा कारखाना उघडपणे चालविला जातो. जंगलव्याप्त भागात हे घडत असल्याने कारवाईला अडथळा निर्माण होतो. दशकभरापूर्वी बुलढाणा पोलिसांनी एकदा या भागात शिरण्याची हिंमत दाखवली होती. नंतर काहीही घडले नसल्याने चेक पोस्ट चुकवित जंगल मार्गाने मध्य प्रदेशातून अवैध शस्त्रांची तस्करी सुरू आहे.

महाराष्ट्र आणि मध्य प्रदेशचा सीमा शेजार आहे. खरेदी आणि आरोग्य सेवेसाठी या भागातील गावकरी मध्य प्रदेशात जातात. हा भाग अंबाबरवा अभयारण्याने व्यापला आहे. बऱ्हानपूर सीमा भागातून ६०-७० किलोमीटर अंतरावर मध्य प्रदेशात ही निर्मिती स्थळे आहेत. अक्षरशः गावठी पिस्तुल घराघरात या ठिकाणी तयार होतात. या अवैध शस्त्र तस्करी करणाऱ्यांनी अंबाबरवा अभयारण्यातून तस्करीचा मार्ग तयार केला आहे. या मार्गाने विदर्भातील बुलढाणा, अकोला आणि अमरावती जिल्ह्याच्या सीमा भागात देशीकट्ट्यांची देवाणघेवाण केली जाते. खान्देशातला जळगाव भागही गुन्हेगारी जगतामध्ये सोयीचा मानला जातो. या खरेदीसाठी सांकेतिक भाषेचा वापर केला जातो. अमरावतीत एका गाडीवर झालेला गोळीबार, बुलढाणा जिल्ह्यातील खामगाव तालुक्यात निमकवळा येथे पारधी वस्त्यांवर झालेल्या गोळीबाराचे कनेक्शन सीमा भागातील या शस्त्र तस्करीशी असल्याचे सूत्र सांगतात. यावर वचक निर्माण करण्यासाठी पोलिस आपापल्या भागामध्ये कारवाई करतात. एका राज्यात कारवाई झाल्यानंतर दुसऱ्याचा आधार मिळतो. यातूनच तस्करांचे फावते.

निर्मिती केंद्र कारवाईपासून दूर

थोड्या फार मोबदल्याची अपेक्षा असलेले आदिवासी आरोपी म्हणून दाखविले जातात. ठाणे पोलिसांच्या पथकाने मागील वर्षी संग्रामपुरात मोठी कारवाई केली होती. देशीकट्टे, जिवंत काडतूसह काही आरोपींना अटक करण्यात आली. हे सर्व आरोपी मध्य प्रदेश आणि विदर्भाच्या सीमाभागातील होते. पण, शस्त्रनिर्मिती होत असलेल्या भागात आजवर मोठी कारवाई करण्यात आली नाही. हीच बाब कायदा आणि सुव्यवस्थेच्या दृष्टीने अडचणीची मानली जात आहे.

पिंपरी चिंचवडमध्ये मेणबत्ती कारखान्याला आग, सात जणांचा मृत्यू