मेट्रोच्या विस्तारीकरणाला हिरवा कंदील; प्रकल्प सनियंत्रण कक्षाच्या बैठकीत निर्णय, अजित पवारांनी आढावा घेतला

रुबी ते रामवाडी मार्ग
वनाज ते रामवाडी या मार्गातील रुबी हॉल ते रामवाडी या टप्प्याची प्राथमिक चाचणी पूर्ण झाली असली तरी या मार्गातील दोन ते तीन खांब वाहतुकीला अडथळा ठरत आहेत. त्यासाठी हे खांब योग्य त्या ठिकाणी पुन्हा उभारावे लागतील, असे सांगून त्यासाठी अतिरिक्त जमीन लागणार असल्याचे मेट्रोच्या अधिकाऱ्यांनी बैठकीत सांगितले. त्यावर पवार यांनी याबाबत तातडीने कार्यवाही करून मार्ग लवकरात लवकर खुला करावा, अशा सुचना दिल्याचे अधिकाऱ्यांनी सांगितले. या टप्प्यासाठी नव्याने अतिरिक्त जागेचे संपादन करावे लागणार असून हा मार्ग खुला होण्यास आणखी विलंब लागण्याची शक्यता आहे.

शहराबाहेरील मेट्रोला गती
स्वारगेट ते लोणीकाळभोर, हडपसर ते खराडी तसेच रामवाडी ते वाघोली या मेट्रो विस्तारित मार्गांचा तांत्रिक अहवाल तातडीने तयार करून राज्य सरकारला सादर करण्याचे निर्देशही अजित पवार यांनी दिले आहेत. त्यामुळे मेट्रोच्या विस्तारीकरणाला गती मिळेल, असा विश्वास व्यक्त करण्यात येत आहे.

हिंजवडी ते शिवाजीनगर मेट्रो
हिंजवडी ते शिवाजीनगर या मेट्रो मार्गासाठी राजभवन येथील मार्गावर पादचाऱ्यांसाठी उड्डाणपूल उभारण्यात येत आहे. याठिकाणी राजभवन परिसराची सुरक्षितता लक्षात घेऊन स्टील आणि सिमेंट यांचा वापर करून सुरक्षिततेच्या सर्व उपाययोजना करण्यात याव्यात. तसेच लोकप्रतिनिधी आणि नागरिकांच्या मागणीनुसार प्रकल्पाच्या कामात काही ठिकाणी सुधारणा करण्यात आली आहे. या सुधारणांनुसार मेट्रो प्रकल्पाच्या सुधारित प्रकल्प किंमतीस केंद्रीय नगरविकास विभागाची मान्यता आवश्यक आहे. याबाबत केंद्रीय मंत्र्यांशी चर्चा करून याबाबतच्या अडचणी सोडविण्यात येतील, असेही पवार यांनी यावेळी सांगितले.