Tej Police Times
VSI च्या वार्षिक सर्वसाधारण सभेला अजित पवारांची दांडी, शरद पवारांसमोर जाणं दादांनी पुन्हा टाळलं
पुणे : वसंतदादा शुगर इन्स्टिट्यूट येथे होणाऱ्या ४७ व्या वार्षिक सर्वसाधारण सभेसाठी आज उपमुख्यमंत्री अजित पवार यांच्यासह मुख्यमंत्री एकनाथ शिंदे यांनी दांडी मारली आहे. शिवसेना नेमकी कोणाची आणि आमदारांच्या अपात्रतेबाबत काल विधानसभा अध्यक्ष राहुल नार्वेकर यांनी ऐतिहासिक निर्णय दिल्यानंतर आज दोन्ही नेत्यांनी पुण्यातील वसंतदादा शुगर इन्स्टिट्यूटच्या सभेला उपस्थित राहणार नसल्याची माहिती आहे. शिवसेनेच्या आमदार अपात्रता निकालानंतर आज पुण्यात दोन्ही पवार एका मंचावर पाहायला मिळणार होते. परंतु अजित पवार यांनी पुन्हा एकदा काका शरद पवार यांच्या समोर येणं टाळलं आहे. याच कारण अद्याप अस्पष्ट आहे.
४७ वी वार्षिक सर्वसाधारण सभा वसंतदादा शुगर इन्स्टिट्यूट येथे पार पडणार आहे. या कार्यक्रमाला अध्यक्ष शरद पवार, सहकार मंत्री दिलीप वळसे पाटील, शरद पवार गटाचे प्रदेशाध्यक्ष जयंत पाटील आणि सभासद उपस्थित राहणार आहेत. उपमुख्यमंत्री अजित पवारही या कार्यक्रमाला उपस्थित राहणार होते मात्र त्यांनी कार्यक्रमाकडे पाठ फिरवली तसेच या कार्यक्रमाचे पुरस्कार वितरण मुख्यमंत्र्यांच्या हस्ते होत असतात मात्र मुख्यमंत्री एकनाथ शिंदेही या कार्यक्रमाला येणार नसल्याची माहिती आहे.
शिवसेना कोणाची याकडे अख्या देशाचे लक्ष लागले असताना राष्ट्रवादी काँग्रेसमधून अजित पवार यांनी बंड पुकरल्यानंतर राष्ट्रवादी कोणाकडे जाणार याकडे सगळ्यांच लक्ष लागले आहे. एकनाथ शिंदे यांनी गुवाहाटीला जात आपल्यासोबत एका मागे एक असे चाळीस आमदारांना बोलून घेतले आणि त्यानंतर भाजपा सोबत सत्ता स्थापन केली. त्याप्रमाणे राष्ट्रवादी अजित पवार यांनी बंड केल्यानंतर अद्याप दोन्ही गटांकडून कोणाकडे किती आमदारांच संख्या बळ आहे हे अजून स्पष्ट नाही केलं. त्यामुळे राष्ट्रवादी काँग्रेस पक्ष कोणाकडे जाणार याचा अंदाज कोणाला बांधता येत नाही.
उपमुख्यमंत्री अजित पवार यांनी बंड केल्यानंतर सुद्धा पवार काका- पुतण्यांची कौटुंबिक भेट अनेकदा झाली आहे. पुण्यात त्यांच्या नातेवाईकांच्या घरी असो की बारामती मध्ये त्यांच्या कौटुंबिक कार्यक्रमात उपमुख्यमंत्री अजित पवार यांनी हजेरी लावलेली आहे. त्यासोबत सामाजिक व राजकीय कार्यक्रमात देखील अनेकदा एकत्र पाहायला मिळाले होते. त्यानुसार आज देखील वसंतदादा शुगर इन्स्टिट्यूट येथे वार्षिक सर्वसाधारण सभा साठी शरद पवार आणि अजित पवार एकाच मंचावर येणार होते. मात्र अजित पवारांनी या कार्यक्रमाला दांडी मारली आहे.