जामिनानंतर समर्थकांचा जल्लोष महागात; सुनील केदार यांच्या अडचणीत वाढ, विविध कलमांखाली गुन्हा दाखल

नागपूर मध्यवर्ती कारागृहात अनेक नक्षलवादी आणि काही दहशतवादी राहतात, असे असतानाही बुधवारी सुनील केदार यांची तुरुंगातून सुटका झाल्यानंतर त्यांचे समर्थक कारागृहासमोर जमा झाले. एक दिवसा आधी पोलिसांनी सुनील केदार यांच्या कार्यकर्त्यांना येथे गर्दी न करण्याच्या सूचना दिल्या होत्या. मात्र, जमावाकडून घोषणाबाजी करण्यात आली. एफआयआरमध्ये असे म्हटले आहे की कारागृह परिसर सुरक्षेच्या दृष्टीने संवेदनशील आहे. तेथे अशी कृत्ये करू नयेत असे सांगण्यात आले असतानाही केदार यांचा कार्यकर्त्यांनी तेथे जमून घोषणाबाजी केली. केदार तुरुंगातून बाहेर येताच कारच्या सनरूफमधून बाहेर आले.

कारागृहासमोर कार्यकर्त्यांना अभिवादन केले. त्याच ठिकाणी कार्यकर्त्यांनी त्यांची गाडी थांबवून केदार यांना पुष्पहार घातले. पोलिसांनी अशी सर्व माहिती एफआयआरमध्ये नोंदवली आहे. इतकंच नाही तर बुधवारच्या रॅलीत सहभागी असलेल्या २० हून अधिक चारचाकी वाहनांचा क्रमांकही पोलिसांनी एफआयआरमध्ये नमूद केला आहे. मिळालेल्या माहितीनुसार, पोलीस या गाड्यांचा तपशील तपासत असून या सर्व गाड्या विविध बेकायदेशीर कामात गुंतलेल्या माफियांशी संबंधित असण्याची शक्यता पोलिसांना आहे. त्यामुळे पोलिसांच्या तपासानंतर सुनील केदारच्या अडचणीत वाढ होण्याची शक्यता आहे.