काँग्रेसचे डॉ.उल्हास पाटील कन्या केतकीसह भाजपात प्रवेश; शेकडो समर्थकही ‘जय श्री राम’ म्हणत भाजपवासी झाले

अनेक वर्षांपासून काँग्रेसकडून रावेर लोकसभा निवडणुक लढविण्याची तयारी करणाऱ्या डॉ. उल्हास पाटील यांच्या कन्या डॉ. केतकी पाटील या राजकारणात सक्रीय झाल्या. तेव्हापासूनच त्या भाजपात जाणार असल्याची चर्चा होती. त्यानंतर भाजपाच्या वरिष्ठांशी केतकी पाटील यांनी भेटी घेतल्याचेही वृत्त आले होते. त्यानंतर डॉ. उल्हास पाटील यांचेही भाजपात प्रवेश करण्यासाठी तळ्यात मळ्यात सुरु होते. या सर्व घडामोडींच्या पार्श्वभूमीवर दोन दिवसांपूर्वी डॉ. उल्हास पाटील, डॉ. वर्षा पाटील व काँग्रेसचे युवक जिल्हाध्यक्ष देवेंद्र मराठे यांचे कॉंग्रेसमधून सहा वर्षांसाठी निलंबन करण्यात आले. यानंतर डॉ. उल्हासदादा पाटील यांनी पत्रकार परिषद घेऊन कॉंग्रेसवर टिकास्त्र सोडले होते. याप्रसंगी त्यांनी स्पष्टपणे आपली कन्या डॉ. केतकी पाटील या भाजपमध्ये प्रवेश करणार असून आपण देखील लवकरच निर्णय घेणार असल्याचे संकेत दिले होते.

अखेर या अनुषंगाने आज बुधवारी मुंबईत भाजपा प्रदेश कार्यालयात झालेल्या प्रवेश सोहळ्यात डॉ. उल्हास पाटील पत्नी व कन्येसह भाजपात दाखल झालेत. त्यांच्यासह काँग्रेसे युवक अध्यक्ष देवेंद्र मराठे, शैलेश राणे, संदेश पाटील, पुंजाजी पाटील व पाटील यांचे शेकडो समर्थकांनीही भाजपात प्रवेश केला.

यावेळी भाजपाचे प्रदेशाध्यक्ष चंद्रशेखर बावनकुळे, जळगाव जिल्हा नेते मंत्री गिरीश महाजन आदी नेत्यांनी यांचे स्वागत केले. याप्रसंगी आमदार मंगेश चव्हाण, भाजप प्रदेश महामंत्री विजय चौधरी, जिल्हाध्यक्ष अमोल जावळे, माजी जि.प. उपाध्यक्ष नंदकुमार महाजन यांच्यासह आदींची मोठ्या संख्येने उपस्थिती होती.

मोदींच्या नेतृत्वावर विश्वास

संपूर्ण देशवासियांचे राम लल्ला प्राणप्रतिष्ठा सोहळ्याचे स्वप्न पूर्ण करणाऱ्या तसेच देशाला विकासाच्या वाटेने नेणाऱ्या पंतप्रधान नरेंद्र मोदी यांच्या नेतृत्वावर विश्वास ठेवून भाजपात प्रवेश केल्याचे डॉ.उल्हास पाटील व केतकी यांनी सांगीतले. पंतप्रधान मोदी यांच्यासह देवेंद्र फडणवीस यांच्यावर स्मृती सुमने उधळतांनाच काँग्रेसचे नेते आम्हाला भेटत देखील नव्हते, अशी खंतही डॉ. उल्हास पाटील यांनी व्यक्त केली.

नाशिकमधूनही लवरकरच प्रवेश

यावेळी बोलतांना मंत्री गिरीश महाजन यांनी डॉ. उल्हास पाटील यांच्यासमुळे खान्देशात भाजपाची ताकद वाढणार असल्याचे सांगत लवकरच नाशिक येथून ही काही नेते लवकरच भाजपात प्रवेश करणार असल्याचे संकेत दिले आहेत. उत्तर महाराष्ट्रातील आठही जागांवर मोठ्या फरकाने भाजप विजय मिळवेल असा विश्वासही त्यांनी व्यक्त केला.