PIFF मध्ये ‘सिटीझन सेंट’ उत्कृष्ट आंतरराष्ट्रीय चित्रपट तर, मराठीमध्ये ‘स्थळ’ची बाजी

राज्य सरकार आणि पुणे फिल्म फाउंडेशन यांच्यातर्फे आयोजित करण्यात आलेल्या ‘२२ व्या पुणे आंतरराष्ट्रीय चित्रपट महोत्सवात’ समारोप समारंभात गुरुवारी संध्याकाळी विविध पारितोषिकांची घोषणा करण्यात आली. सकल ललित कला केंद्रामध्ये झालेल्या या कार्यक्रमाला महोत्सवाचे संचालक डॉ. जब्बार पटेल, ‘नॉर्थ अमेरिका मराठी असोसिएशन’ (नाफा)चे अध्यक्ष अभिजीत घोलप, पुणे फिल्म फाउंडेशनचे सरचिटणीस रवी गुप्ता, अखिल भारतीय मराठी चित्रपट महामंडळाचे अध्यक्ष मेघराज राजेभोसले, विश्वस्त सतीश आळेकर, डॉ. मोहन आगाशे, एमआयटी- एडीटी विद्यापीठाचे प्र-कुलगुरू मोहित दुबे, आंतरराष्ट्रीय ज्यूरी, चित्रपट निवड समितीचे सदस्य उपस्थित होते.

जॉर्जिया देशातील ‘सिटीझन सेंट’ या चित्रपटाला राज्य सरकारचे ‘प्रभात’ उत्कृष्ट आंतरराष्ट्रीय चित्रपटाचे दहा लाख रुपयांचे पारितोषिक मिळाले. दिग्दर्शक कजरिशविली आणि निर्माते लाशा खलवशी यांना प्रत्येकी पाच लाख रुपये विभागून देण्यात आले. ‘स्थळ’ या चित्रपटाला उत्कृष्ट आंतरराष्ट्रीय मराठी चित्रपटाचे पाच लाख रुपयांचे पारितोषिक मिळाले. मारीया प्रोचाझस्का या पोलिश चित्रपट निर्मातीने दिलेल्या निधीतून देण्यात येणारे खास पारितोषिक एफटीआयची विद्यार्थिनी आयशा जैन हिला देण्यात आले.

पुणे आंतरराष्ट्रीय चित्रपटाच्या सहकार्याने अमेरिकेतील कॅलिफोर्निया सॅन होजे येथील कॅलिफोर्निया चित्रपट गृहात २७ आणि २८ जुलै २०२४ या दोन दिवशी अमेरिकेतील पहिला मराठी चित्रपट महोत्सव ‘नाफा’ आजोजित करण्यात येणार असल्याची घोषणा ‘नॉर्थ अमेरिका फिल्म असोसिशन’चे अध्यक्ष अध्यक्ष अभिजीत घोलप आणि ‘पिफ’चे संचालक डॉ. जब्बार पटेल यांनी केली.