संतापजनक! आठवीतील विद्यार्थ्यावर वसतिगृह संचालकाचा अनैसर्गिक अत्याचार, परभणी हादरलं

परभणी शहरातील पेडगाव रोड परिसरात सह्याद्री निवासी गुरुकुल नावाचे वसतीगृह आहे. हे वसतिगृह सुदर्शन भांबळे चालवतो. त्यांच्या वसतिगृहात मोठ्या प्रमाणावर विद्यार्थी संख्या आहे. त्या विद्यार्थ्यांपैकी आठवीच्या वर्गात शिकणारा एका विद्यार्थ्यासोबत आरोपी सुदर्शन भांबळे यांनी डिसेंबर २०२३ मध्ये अनैसर्गिक अत्याचार केला. मात्र, पीडित मुलाने ही गोष्ट भीतीपोटी कोणाला सांगितली नाही.

उच्चशिक्षित पत्नीला ऑस्ट्रेलियात विकायला लावली भाजी, कारमध्येही कोंडले, नागपुरात तिघांवर गुन्हा

काही दिवसांपूर्वी शाळेला सुट्टी असल्याने पीडित मुलगा गावी गेला होता. गावाकडे पाच-सहा दिवस राहिल्यानंतर सुट्ट्या संपल्यावर तो परभणीला येण्याचे नावही घेत नव्हता. मुलगा शाळेसाठी परभणीला का जात नाही म्हणून पालकांमध्ये चिंता वाढली. पीडित मुलाच्या आईने मुलाला जवळ घेऊन मायेने हात फिरवून विचारले असता पीडित मुलाने आपल्या सोबत झालेला पूर्ण प्रसंग आईला सांगितला. आईने घडलेला प्रकार आपल्या नवऱ्याला सांगितला. मुलाने सांगितलेली घटना ऐकून मात्यापित्यांना धक्काच बसला.

पीडित विद्यार्थ्याचे वडील आणि मुलाचा चुलता दोघे मिळून परभणी येथील सह्याद्री वसतिगृहात आले. त्यांनी आरोपी सुदर्शन भांबळे याला माझ्या मुलाशी गैरकृत्य का केले म्हणून जाब विचारला. आरोपी सुदर्शन भांबळे यांनी आपला गुन्हा तर कबूल केलाच नाही उलट पीडित मुलाच्या वडिलांना आणि चुलत्याला मारहाण केली. त्यामुळे पीडित मुलाचे वडील तात्काळ कोतवाली पोलीस स्टेशनमध्ये आले आणि त्यांनी हॉस्टेल चालक सुदर्शन भांबळे यांच्या विरुद्ध गुन्हा दाखल केला. सदरील गुन्ह्याचा तपास कोतवाली पोलीस ठाण्याचे पोलीस निरीक्षक शरद जराड यांच्या मार्गदर्शनाखाली सहाय्यक पोलीस निरीक्षक दिनेश मुळे करत आहेत.