बर्न वॉर्डबाबत ‘यू टर्न’? लोकप्रतिनिधींना पालिकेला धरले धारेवर, दुर्लक्ष होत असल्याचा आरोप

दोन जागांचे पर्याय समोर

‘बर्न वॉर्ड’ सुरू करण्यासाठी जुन्या आकुर्डी रुग्णालयाच्या जागेचा विचार झाला. मात्र, ही इमारत ४२ वर्षे जुनी आहे. नजीकच्या काळात इमारतीचा पुनर्विकास शक्य आहे. त्यामुळे या ठिकाणी सुविधा उपलब्ध करून देण्याचा प्रस्ताव बारगळला. जळीतग्रस्तांसाठी सहज, सुलभ आणि आधुनिक उपचार मिळावेत, या दृष्टीने थेरगावबरोबरच नवीन तालेरा रुग्णालय आणि यशवंतराव चव्हाण स्मृती रुग्णालयाचे पर्याय पुढे आले आहेत. त्यापैकी एका ठिकाणी सुविधा निर्माण होण्याची शक्यता आहे.

माजी नगरसेविकेचे पत्र

माजी नगरसेविका सीमा सावळे यांनी आयुक्तांना पत्र पाठवून या गंभीर मुद्याकडे लक्ष वेधले आहे. ‘शहरातील आगीच्या दुर्घटनांमध्ये वाढ झाली असून, भाजलेल्या रुग्णांवर उपचारांसाठी पुण्यात ससून रुग्णालयात जावे लागते. या शहरात स्वतंत्र बर्न वॉर्ड व्हावा, अशी मागणी केली होती. त्यावर चर्चा होऊन प्रस्तावाला मंजुरीही देण्यात आली. मात्र, अजूनही प्रस्ताव पुढे सरकलेला नाही,’ असे सावळे यांनी पत्रात म्हटले आहे.

‘अन्य जागा कशासाठी?’

महापालिकेच्या थेरगाव येथील रुग्णालयातील एक मजला ‘बर्न वॉर्ड’साठी करण्याचे ठरले. त्याप्रमाणे बांधकाम नकाशे मंजूर करण्यात आले. मात्र, करोनाच्या काळात हे रुग्णालय करोनाग्रस्तांसाठी वापरण्यात आले. त्यामुळे ‘बर्न वॉर्ड’चा मुद्दा दुर्लक्षित झाला.“गरजेच्या काळामध्ये या ठिकाणी तातडीने सुविधा उपलब्ध करून देण्याऐवजी अन्यत्र जागेचा शोध कशासाठी केला जात आहे,’ असा सवाल उपस्थित करून ‘लोकांच्या जीवाशी न खेळता प्रशासनाने तातडीने ही सुविधा उपलब्ध करावी,’ अशी मागणी सावळे यांनी केली आहे.

पालिका प्रशासनाची दिरंगाई

थेरगाव येथील नवीन रुग्णालयात दोनशेपैकी ३० खाटा स्वतंत्रपणे जळीत रुग्णांसाठी असतील, असे नियोजन होते. त्या अनुषंगाने कार्यवाही करावी, अशी मागणी आमदार महेश लांडगे यांनी हिवाळी अधिवेशनात उपमुख्यमंत्री देवेंद्र फडणवीस यांच्याकडे केली होती. याशिवाय सभागृहातील चर्चेत या मुद्याकडेही लक्ष वेधले होते. या सर्व बाबी लक्षात घेता पालिका प्रशासनाने तातडीने निर्णय घेण्याची गरज व्यक्त करण्यात येत आहे.
जिल्ह्यात तिसरी महापालिका? विभागीय आयुक्त कार्यालयाकडून राज्य सरकारने मागवला अभिप्राय
दोन दिवसांत अंतिम निर्णय?

शहरात ‘बर्न वॉर्ड’ निर्माण करण्याच्या अनुषंगाने वेगाने हालचाली झाल्या आहेत. थेरगाव, तालेरा किंवा यशवंतराव चव्हाण स्मृती रुग्णालय यापैकी एका ठिकाणी जळीतग्रस्तांसाठी उपचारांची सुविधा दिली जाणार आहे. याबाबत पालिकेने प्रस्ताव तयार केला असून, त्याबाबत अंतिम निर्णय येत्या दोन दिवसांत घेतला जाईल, असे प्रशासनाकडून स्पष्ट करण्यात आले.

जळीतग्रस्तांवर उपचारासाठी पालिकेने थेरगाव येथे उभारलेल्या रुग्णालयातील एक मजला कायमस्वरुपी करण्याचा निर्णय पालिकेच्या सर्वसाधारण सभेने यापूर्वीच मंजूर केला आहे. आता पुन्हा नव्याने याच विषयावर काथ्याकूट चालू आहे. तो बंद करावा आणि थेरगाव येथेच बर्न वॉर्ड तातडीने निर्माण करावा.- सीमा सावळे, माजी अध्यक्ष, स्थायी समिती, पिंपरी-चिंचवड महापालिका

शहरात बर्न वॉर्ड निर्माण करायचा आहे. त्यासाठी आरोग्य वैद्यकीय विभागाने गांभीर्याने पावले उचलली आहेत. सर्वंकष विचार करून स्थान निश्चित करण्यात येणार आहे. त्यासंदर्भातील प्रस्ताव पालिका आयुक्त शेखर सिंह यांच्याकडे मंजुरीसाठी पाठवला आहे. त्यावर निर्णयाच्या प्रतीक्षेत आहोत.- डॉ. लक्ष्मण गोफणे, वैद्यकीय अधिकारी, पिंपरी-चिंचवड महापालिका