एसटीच्या ६० टक्के बस जुन्या, गाड्या रस्त्यात बंद पडण्याच्या घटनांमध्ये वाढ, प्रवाशांचे हाल

एसटीने महिलांसाठी सन्मान योजना जाहीर केल्यानंतर सर्वच भागांत प्रवाशांची गर्दी वाढली आहे. पुणे विभागातून सुटणाऱ्या गाड्यांना प्रवाशांची गर्दी असली, तरी विभागाकडे पुरेशा बसच नाहीत. उपलब्ध बसपैकी ६० टक्क्यांपेक्षा जास्त बस दहा वर्षे पूर्ण झाल्यामुळे त्या खिळखिळ्या झाल्या आहेत. त्यामुळे बस संचालनावर परिणाम होत आहे.

प्रवाशांना मनस्ताप

पुणे विभागात एकूण १३ आगार असून विभागाकडे साधारण ८२० बस आहेत. यामध्ये साधारण ७५० बस मार्गावर धावतात. दररोज साधारण ६० ते ७० बस बंद असतात, तर ६० भाडेतत्त्वावरील बस मार्गावर धावतात. एकूण बसपैकी ५२१ बसला दहा वर्षे पूर्ण झाली आहेत. तरीही या बस मार्गावर धावत आहेत. त्यामुळे अधून-मधून रस्त्यात एसटी बस बंद पडण्याचे प्रकार वाढत आहेत. त्यामुळे प्रवाशांना रस्त्यामध्ये पुन्हा दुसऱ्या बसची वाट पाहवी लागते.

जुन्या बसवर संचालन

करोनापूर्वी राज्य एसटी महामंडळाच्या ताफ्यात १८ हजार बसची संख्या होती. मात्क, त्यानंतर बसखरेदी झाली नाही. त्यामुळे बसची संख्या घटत गेली. सध्या एसटी महामंडळाच्या ताफ्यात साधारण १४ हजार बस आहेत. त्यामध्ये निम्म्या बसला दहा वर्षे पूर्ण होत आली आहेत. त्यामुळे एसटीची सेवा जुन्या बसवरच सुरू आहे. काही महिन्यांपूर्वी एसटी महामंडळाकडून नव्याने आठ हजार बस खरेदीचा प्रस्ताव देण्यात आल्या आहे. त्यापैकी पाच हजार बस ‘इलेक्ट्रिक’च्या असणार आहेत. त्या बस येण्यास उशीर लागत आहे. त्यामुळे एसटीची संख्या कमी होत आहे.

नवीन बस मुंबई मार्गावर

एसटी महामंडळाच्या ताफ्यात दाखल झालेल्या बहुतांश ई-बस या प्रामुख्याने मुंबई मार्गावरच धावत आहेत. काही बस छत्रपती संभाजीनगर, कोल्हापूर, नाशिक, सोलापूर या मार्गावर सुरू केल्या आहेत. त्याची संख्या खूपच नगण्य आहे. त्यामुळे जुन्या बस शिवाय प्रवाशांना पर्याय नाही.

कोट

सोलापूर ते पुणे प्रवास करीत असताना इंदापूरजवळ रात्री आठच्या सुमारास एसटी बस बंद पडली. त्यामुळे आम्हाला रस्त्यात उतरून दुसऱ्या बसची अर्धा तास वाट पाहावी लागली. महिला म्हणून आम्हाला अगोदर दुसऱ्या बसमध्ये बसविले. मात्र, त्या बसमध्ये बसण्यासाठी जागा मिळाली नाही.

– धनश्री गरड, प्रवासी

आकडे काय सांगतात?

पुणे विभागातील एकूण आगार : १३

पुणे विभागातील एकूण बस : ८२०

बंद बसची संख्या : ६० ते ७०

मार्गावर धावणाऱ्या बस : ७०० ते ७५०

दहा वर्षे जुन्या बस : ५२१

भाडेतत्त्वावरील बस : ७० ते ८०

कोट

पुणे विभागाकडून मार्गावर जाणाऱ्या सर्व गाड्यांची दररोज देखभाल दुरुस्ती केली जाते. नादुरुस्त बस मार्गावर सोडल्या जात नाहीत. सतत बसच्या देखभाल दुरुस्तीचा आढावा घेतला जातो. प्रवाशांना त्रास होऊ नये म्हणून नियमितपणे काळजी घेतली जाते.

– कैलास पाटील, विभाग नियंत्रक, पुणे एसटी विभाग