बदलीनंतरही ज्योती देवरेंविरोधात तक्रार; अडचणी वाढण्याची शक्यता

अहमदनगर: पारनेरच्या वादग्रस्त तहसिलदार ज्योती देवरे यांच्यावर कर्तव्यात कसूर केल्याचा ठपका ठेवत त्यांची जळगावला बदली करण्यात आली आहे. मात्र, त्यांच्याविरुद्ध पारनेर तालुक्यातून तक्रारी सुरूच आहेत. तालुक्यातील कारभारी भाऊसाहेब पोटघन यांनी देवरे यांच्याविरुद्ध लाच लुचपत प्रतिबंधक विभागाकडे तक्रार दाखल केली. देवरे यांनी त्यांच्या उत्पन्नापेक्षा जास्त संपत्ती गोळा केली तसेच पदाचा गैरवापर करत गैरव्यवहार केला असून त्याची चौकशी करण्याची मागणी पोटघन यांनी केली आहे.

नगरच्या लाच लुचपत प्रतिबंधक पथकाचे पोलिस उपअधीक्षक हरीष खेडकर यांच्याकडे पोटघन यांनी ही तक्रार दाखल केली. त्यावेळी त्यांच्यासोबत त्यांचे वकील अॅड. असीम सरोदे उपस्थित होते. पोटघन यांनी तक्रारीत म्हटले आहे की, देवरे यांनी वाळूचा उपसा, जमिनीचा अकृषक वापर रुपांतरीत करून देणे अशा अनेक प्रकरणांत गैरप्रकार केला आहे. त्यांनी मोठी वाहने, जेसीबी, डम्पर, ट्रॅक्टर अशी वाहने जप्त केली. त्याबद्दल कोणतेही शुल्क आकारले नाही. त्यांची कारवाई संशयास्पद आहे. त्यामुळे या कारभाराची चौकशी व्हावी, अशी मागणी करण्यात आली आहे.

वाचा: धक्कादायक! दशक्रियेसाठी गेलेल्या कुटुंबाची बोट पलटी होऊन ११ जण बुडाले, ३ जणांचे मृतदेह हाती

तक्रार दाखल झाल्यावर अॅड. सरोदे यांनी पत्रकारांशी संवाद साधला. ते म्हणाले, ‘देवरे यांच्यासारख्या प्रवृत्तींच्या विरोधात आमचा हा अर्ज आहे. त्यांनी पुढील काळात आपल्या कार्यपद्धतीत बदल केला पाहिजे. महिला अधिकारी-कर्मचाऱ्यांना कामाच्या ठिकाणी अनेक प्रकारचे दबाव सहन करावे लागतात. तसाच अन्याय जर देवरे यांच्यावरही होत असेल तर मी स्वतः वकील म्हणून त्यांच्या बाजूने आहे. मात्र, केवळ महिला म्हणून त्यांनी सहानुभूती मिळविण्याचा प्रयत्न करू नये. या पद्धतीने भ्रष्टाचाराची पाठराखण करता येणार नाही. चौकशीतून आपली सुटका व्हावी यासाठी भावनिक ऑडिओच्या माध्यमातून प्रयत्न करणे हा सुद्धा गैरफायदा घेण्याचा प्रकार आहे. यामुळे कामाच्या ठिकाणी ज्या महिलांचे लैगिक अथवा अत्याचार होतात. त्याचे महत्त्व कमी होते.’

क्लिप व्हायरल कशी झाली?

गेल्या महिन्यात देवरे यांची आत्महत्येचा इशारा देणारी क्लीप व्हायरल झाल्यावर हे प्रकरण समोर आले होते. लोकप्रतिनिधींकडून त्रास होत असल्याचे त्यात देवरे यांनी म्हटले आहे. त्यानंतर माध्यमांशी बोलताना ही क्लिप त्यांचीच असल्याचे त्यांनी मान्य केले असले तरी ती आपण व्हायरल केली नसल्याचे म्हटले होते. आपल्या भावाकडून एका पत्रकाराला गेली आणि त्या पत्रकाराने ती व्हायरल केली, असे त्या म्हणाल्या होत्या. यात त्यांनी केलेल्या दाव्यांमध्ये तथ्य नसल्याचे चौकशी समितीने आपल्या अहवालात म्हटले आहे. त्यामुळे ही क्लिप तयार करण्यास आणि व्हायरल करण्यास मदत करणाऱ्यांसंबंधीही आता प्रश्न उपस्थित केले जाऊ लागले आहेत.

वाचा: परप्रांतीयांची नोंद; भाजप आक्रमक, मुख्यमंत्र्यांविरोधात करणार पोलिसात तक्रार