Tej Police Times
म. टा. प्रतिनिधी, पुणे
सचिन काळभोर (वय ४०, रा. पिसोळी) असे आत्महत्या केलेल्याचे नाव आहे. या प्रकरणी सुहास ननावरे (रा. धायरी) याच्याविरुद्ध आत्महत्येस प्रवृत्त केल्याचा गुन्हा दाखल करण्यात आला आहे. याबाबत कामिनी काळभोर यांनी तक्रार दिली आहे.
पोलिसांनी दिलेल्या माहितीनुसार, सचिन आणि कामिनी पती-पत्नी असून, त्यांनी काही वर्षांपूर्वी सदनिकेची खरेदी केली होती. त्याचे शेवटचे हप्ते भरून कर्ज कमी करण्यासाठी सचिनने मित्र सुहास ननावरे यांच्याकडून पाच लाख रुपये व्याजाने घेतले होते. व्याजापोटी सचिन दर महिन्याला सुहासला सुमारे १० टक्के दराने ५० हजार रुपये देत होता. त्यामुळे सचिनची आर्थिक ओढाताण होत होती. काही दिवसांनी सुहासने सचिनला दिलेल्या पाच लाख रुपयांसाठी तगादा लावला होता; परंतु पैसे नसल्यामुळे सचिन त्याला महिन्याला ५० हजारांचे व्याज देत होता. दिलेली रक्कम परत माघारी हवी, यासाठी सुहास सचिनला शिवीगाळ करीत होता. त्यामुळे या त्रासाला कंटाळून सचिनने त्याला सदनिका नावावर करून देतो, असे सांगितले. मात्र, सुहासने ‘मला पैसे पाहिजेत, नाहीतर तुझ्या बायको-पोरांना रस्त्यावर आणेन,’ अशी धमकी दिली. त्यामुळे सततच्या मानसिक त्रासाला कंटाळून सचिनने पाच ऑगस्ट २०२०मध्ये राहत्या घरात गळफास घेऊन आत्महत्या केली. या प्रकरणी कोंढवा पोलिस ठाण्यात अकस्मात मृत्यूची नोंद करून तपास सुरू होता. त्यानंतर गुन्हा दाखल करण्यात आला आहे.