भावाशी फोनवर बोलला, काही वेळात मृतदेह कारमध्ये आढळला, भारतीय तरुणाची कॅनडामध्ये हत्या

वृत्तसंस्था, ओटावा : कॅनडातील व्हँकुव्हरमध्ये चिराग अंतिल (२४) या भारतीय तरुणाची हत्या करण्यात आल्याची माहिती पोलिसांनी रविवारी दिली. व्हँकुव्हरच्या सनसेट उपनगरात चिराग त्याच्या कारमध्ये मृतावस्थेत आढळल्याचे पोलिसांनी सांगितले. चिराग मूळचा हरियाणातील सोनिपतचा असून, त्याचा मृतदेह भारतात आणण्यासाठी कुटुंबीयांनी केंद्र सरकारकडे मदतीची मागणी केली आहे.गोळीबाराचा आवाज झाल्याने स्थानिक रहिवाशांनी पोलिसांना माहिती दिली, असे पोलिसांच्या प्रवक्त्या तानिया व्हिसिन्तिन यांनी सांगितले. ‘ईस्ट ५५ अव्हेन्यू आणि मेन स्ट्रीट येथून १२ एप्रिलला सकाळी अकराच्या सुमारास पोलिसांना फोन आला. स्थानिक नागरिकांना चिराग अंतिल हा कारमध्ये मृतावस्थेत आढळला होता,’ असे व्हँकुव्हर पोलिसांनी म्हटले आहे. या प्रकरणी अद्याप कोणालाही अटक करण्यात आली नसून, तपास सुरू असल्याचे पोलिसांनी सांगितले.
Indonesia Landslide: इंडोनेशियात मुसळधार पावसामुळे भूस्खलन; १४ जणांचा मृत्यू, तीन जण बेपत्ता

चिराग सध्या एका सिक्युरिटी एजन्सीत काम करीत होता. चिरागचा भाऊ रोमित अंतिल (रा. हरियाणा) त्याच्याशी दररोज फोनवर बोलायचा. घटना घडली त्या दिवशीही चिरागशी फोनवरून बोलणे झाल्याचे रोमितने स्थानिक माध्यमांना सांगितले. ‘चिराग आनंदी होता. त्याचे कोणाशीही शत्रुत्व नव्हते. आम्हाला न्याय हवा आहे. त्याला का मारले हे आम्हाला कळायला हवे,’ असे रोमित म्हणाला. चिरागला गोळ्या घालून मारण्यात आल्याची माहिती कॅनडातील पोलिसांनी फोनवरून दिल्याचेही कुटुंबीयांनी सांगितले. चिरागचे वडील हरियाणातील निवृत्त सरकारी कर्मचारी आहेत.

चिराग सप्टेंबर २०२२मध्ये व्हँकुव्हरला गेला होता आणि त्याने ‘युनिव्हर्सिटी ऑफ कॅनडा वेस्ट’मधून अलीकडेच ‘एमबीए’ पूर्ण केले होते. त्याला नुकतेच कॅनडातील वर्क परमिट मिळाले होते.