कोण आहेत पल्लवी डेम्पो? १ हजार ४०० कोटींची संपत्ती, दुबई-लंडनमध्ये अपार्टमेंट; या मतदारसंघातून भरला अर्ज

पणजी: लोकसभा निवडणुकीच्या पहिल्या टप्प्यातील मतदान १९ एप्रिल रोजी होणार आहे. या टप्प्यातील प्रचार देखील संपला आहे. देशभरात विविध पक्षातील उमेदवार त्यांचा अर्ज दाखल करत असून त्यातून संबंधित उमेदवारांची संपत्तीचे तपशील समोर येत आहेत. उमेदवारी अर्ज दाखल करताना प्रतिज्ञापत्र देखील सादर करावे लागते ज्यात संपत्तीचे तपशील द्यावे लागतात. अशाच एका उमेदवाराचे प्रतिज्ञापत्र संपत्तीमुळे चर्चेत आले आहे.

लोकसभा निवडणुकीत ४०० पारची घोषणा करणाऱ्या भाजपने दक्षिण गोवा मतदारसंघातून उद्योगपती श्रीनिवास डेम्पो यांच्या पत्नी पल्लवी यांना उमेदवारी दिली आहे. त्यांनी मंगळवारी उमेदवारी अर्ज दाखल केला. पल्लवी यांचा अर्ज दाखल करताना राज्याचे मुख्यमंत्री प्रमोद सावंत देखील उपस्थित होते.

उमेदवारी अर्जासोबत जोडलेल्या प्रतिज्ञापत्रात पल्लवी यांच्याकडे १ हजार ४०० कोटी रुपयांची संपत्ती असल्याचे समोर आले आहे. डेम्पो ग्रुपचा अनेक क्षेत्रात व्यवसाय आहे. ज्यात फुटबॉल लीग, रियल इस्टेट, जहाज निर्माण, शिक्ष आणि खाण उद्योगाचा समावेश आहे.
नाशिक लोकसभा उमेदवारीवरून छगन भुजबळ यांची मोठे वक्तव्य; महायुतींच्या नेत्यांकडे केली ही मागणी

पल्लवी डेम्पो यांच्याकडे २५५.४ कोटी इतकी चल तर श्रीनिवास यांच्याकडे ९९४.८ कोटी इतकी चल संपत्ती आहे. पल्लवी यांच्याकडील अचल संपत्तीचे मुल्य २८.२ कोटी रुपये इतकी आहे. श्रीनिवास यांच्याकडील अचल संपत्तीचे बाजार मूल्य ८३.२ कोटी इतके आहे. या पती-पत्नींकडे गोवा आणि देशातील अन्य ठिकाणी संपत्ती आहे. त्याच बरोबर दुबईत एक अपार्टमेंट देखील आहे. त्याचे बाजार मुल्य २.५ कोटी इतके आहे. तर लंडनमध्ये १० कोटी रुपयांचे एक अपार्टमेंट आहे.

पल्लवी यांनी प्रतिज्ञापत्रात दिलेल्या माहितीनुसार, त्यांच्याकडे ३ मर्सिडीस बेंझ गाड्या असून त्याची किमंत अनुक्रमे १.६९ कोटी, १६.४२ कोटी आणि २१.७३ कोटी इतकी आहे. या शिवाय त्यांच्याकडे ३० लाखांची कॅडिलॅक कार आणि महिंद्रा थार ही १६.२६ लाखांची गाडी आहे. पल्लवी यांच्याकडे ५.७ कोटी रुपयांचे सोन्याचे दागिने आहेत. २०२२-२३ मध्ये त्यांनी १० कोटी रुपयांचा कर भरला होता. तर त्यांचे पती श्रीनिवासन यांनी ११ कोटींचा कर भरला आहे.

४९ वर्षीय पल्लवी यांनी एमआयटी पुणे येथून बिझनेस मॅनेजमेंटमधून पदवी शिक्षण पूर्ण केले आहे. गोव्या लोकसभेच्या दोन जागा आहेत. एक नॉर्थ गोवा आणि दुसरी साउथ गोवा, या ठिकाणी ७ मे रोजी मतदान होणार आहे. उत्तर गोव्यातून भाजपने पाच वेळा खासदार असलेले श्रीपाद नाईक यांना उमेदवारी दिली आहे. श्रीपाद नाईक यांनी प्रतिज्ञापत्रात २.०५ कोटींची चल तर ८.८१ कोटींची अचल संपत्ती असल्याचे नमूद केले आहे.