नागपूर रेल्वे स्थानकावर ट्रेनमध्ये सापडल्या ६ बेवारस बॅग; तपासणीनंतर झाला मोठा खुलासा

नागपूर : तेलंगणा एक्स्प्रेसमधून १ लाख ७ हजार रुपयांचा मद्यसाठा जप्त करण्यात आला आहे. ही कारवाई नागपूर रेल्वे स्थानकावर आरपीएफने केली.

तेलंगणा एक्स्प्रेसमधून मद्याची तस्करी होत असल्याची गुप्त माहिती आरपीएफला मिळाली होती. त्यामुळे ०२७२४ तेलंगणा एक्सप्रेस नागपूर स्थानकावर येताच आरपीएफ तसेच राज्य उत्पादन शुल्क विभाग यांच्या संयुक्त पथकाने कोचमध्ये तपासणी सुरू केली. त्यावेळी एस- ८ कोचमध्ये सहा बॅग बेवारस स्थितीत आढळल्या. पथकाने या बॅगबाबत कोचमध्ये चौकशी केली. मात्र कोणीच त्या आपल्या असल्याचं सांगितलं नाही. त्यामुळे या बॅग उतरवून ठाण्यात आणण्यात आल्या. तेथे त्या उघडून पाहिल्या असता त्यात मद्याच्या १०५ बाटल्या आढळून आल्या.

uri loc : कट उधळला; काश्मीरच्या उरी सेक्टरमध्ये ३ दहशतवाद्यांचा खात्मा

या मद्याची निर्मिती हरियाणा राज्यात झाली आहे. एकूण मद्यसाठा १ लाख ७ हजार ८२० रुपये किमतीचा आहे. ही कारवाई आरपीएफ निरीक्षक आर.एल. मीना यांच्या नेतृत्वात सहायक उपनिरीक्षक रामनिवास यादव, प्राधान आरक्षक ब्रिजेशकुमार, आरक्षक मुनेश गौतम, जसवीर सिंह, राजेश गडपलवार, विवेक कनोजिया, मणिशंकर, राज्य उत्पादन शुल्क विभागाचे निरीक्षक केशव चौधरी, जवान अर्शील मिर्झ व उमेश सोनोने यांनी केली.

दरम्यान, जप्त करण्यात आलेला मद्यसाठा राज्य उत्पादन शुल्क विभागाकडे सुपुर्द करण्यात आला. ही कारवाई आरपीएफ आयुक्त आशुतोष पांडेय यांच्या मार्गदर्शनात करण्यात आली.