तीन चिनी कंपन्यांवर अमेरिकेचे निर्बंध; पाकला क्षेपणास्राचे भाग पुरवल्याने कारवाई

वृत्तसंस्था, वॉशिंग्टन : पाकिस्तानला क्षेपणास्त्राच्या भागांचा पुरवठा केल्याबद्दल अमेरिकेने तीन चिनी कंपन्या आणि बेलारूसमधील एका कंपनीवर निर्बंध लादले आहेत. अमेरिकेच्या परराष्ट्र मंत्रालयाने शुक्रवारी ही माहिती दिली.

शियान लाँगडे टेक्नॉलॉजी डेव्हलपमेंट, तियानजिन क्रिएटिव्ह सोर्स इंटरनॅशनल ट्रेड आणि ग्रॅनपेक्ट कंपनी लिमिटेड या चीनच्या कंपन्या व मिन्स्क व्हील ट्रॅक्टर प्लांट या बेलारूसमधील कंपनीवर हे निर्बंध लादण्यात आले आहेत. ‘या कंपन्यांचा विनाशकारी शस्त्रास्त्रांच्या भागांचे वितरण व प्रसारात सहभाग आढळून आला आहे. त्यांनी वितरित केलेल्या घटकांचा पाकिस्तानकडून वापर केला जाऊ शकतो’, असे परराष्ट्र मंत्रालयाचे प्रवक्ते मॅथ्यू मिलर यांनी नमूद केले. ‘विनाशकारी कारवायांना समर्थन देणाऱ्या व्यवहारांविरोधात कारवाई करून जागतिक पातळीवर घातक शस्त्रांस्त्राचा पुरवठा व प्रसार रोखण्यास अमेरिका कटिबद्ध आहे’, असेही ते म्हणाले.
Iran Israel War: इस्त्रायलने घेतला इराणकडून बदला, यस्फहानवर क्षेपणास्त्र हल्ला, संघर्ष आणखी पेटणार?
लष्करात आधुनिकीकरण करू पाहत असलेल्या पाकिस्तानला प्रमुख्याने मित्रराष्ट्र चीनकडून शस्त्रास्त्रे व अन्य लष्करी उपकरणांचा पुरवठा केला जातो. शियान लाँगडे टेक्नॉलॉजी डेव्हलपमेंट आणि तियानजिन क्रिएटिव्ह सोर्स इंटरनॅशनल ट्रेड कंपनीकडून क्षेपणास्त्राशी संबंधित उपकरणे पुरवली जातात, तर ग्रॅनपेक्ट कंपनीकडून रॉकेट मोटर्सच्या चाचणीसाठीच्या उपकरणांचा पुरवठा केला जातो. याशिवाय बेलारूसच्या मिन्स्क व्हील ट्रॅक्टर प्लांटकडून या देशाला लांब पल्ल्याच्या बॅलिस्टिक क्षेपणास्त्रांसाठी चेसिस पुरवल्या जातात.

पाकिस्तानच्या ‘नॅशनल डेव्हलपमेंट कॉम्प्लेक्स’द्वारे (एनडीसी) या चेसिसचा वापर क्षेपणास्त्रांच्या प्रक्षेपणासाठी केला जातो, असे अमेरिकेच्या परराष्ट्र मंत्रालयाच्या तथ्यपत्रात नमूद करण्यात आले आहे.