ढगळ वर्दी, खांद्यावर तीन स्टार; अल्टोनं मतदान केंद्रावर चेकिंगला पोहोचलेला ‘तो’ कोण निघाला?

लखनऊ: लोकसभेच्या निवडणुकीसाठी आज दुसऱ्या टप्प्यातलं मतदान होत आहे. देशातील १३ राज्यं आणि केंद्रशासित प्रदेशातील ८८ जागांवर आज मतदान संपन्न होत आहे. यामध्ये उत्तर प्रदेशातील ८ जागांचा समावेश आहे. हापूडमधील एका मतदान केंद्राबाहेरुन एका तोतया सीबीआय पोलीस निरीक्षकाला अटक करण्यात आली आहे. अल्टो कारनं पोहोचलेला तरुण आपण निवडणूक कर्तव्यावर असल्याचं सांगत होता. पण त्याचा खोटेपणा उघडकीस आला. मतदान केंद्रावर असलेल्या अधिकाऱ्यांना संशय आला. त्यांनी तरुणाची चौकशी केली आणि त्याचं पितळ उघडं पडलं.

अंकित असं आरोपी तरुणाचं नाव आहे. हापूडमधील मतदान केंद्रापासून काही अंतरावर त्याला पकडण्यात आलं. तो पांढऱ्या रंगाच्या अल्टो कारमधून मतदान केंद्रावर पोहोचला होता. त्याच्या कारवर पुढे उत्तर प्रदेश सरकार असा उल्लेख होता. यासोबतच लाल दिवाही होता. त्याच्याकडे बोगस ओळखपत्र सापडलं. तेच दाखवून तो मतदान केंद्रात तपासणीसाठी निघाला होता.
खासदार गेल्या कुणीकडे? मतदानाला पोहोचल्याच नाहीत; केंद्रावर न जाता ‘भावना’ पोहोचवल्या?
मतदान केंद्रावर पकडण्यात आलेल्या तरुणाचं नाव अंकित असून तो मनोरुग्ण असल्याची प्राथमिक माहिती समोर आल्याचं पोलीस अधीक्षक अभिषेक वर्मा यांनी सांगितलं. अंकितच्या कारमध्ये अनेक बोगस ओळखपत्रं सापडली असल्याची माहिती शर्मांनी दिली. हापूडमधील एल एन पब्लिक स्कूल मतदान केंद्रावर घडली.
मतदान दोन लाख, दादांची कोणाला साथ? मुख्यमंत्री पुत्राची धाकधूक कायम, पुन्हा ‘कल्याण’ होणार?
हापूडमधील मतदान केंद्रावर सीबीआय निरीक्षक बनून लाल दिवा असलेल्या कारमधून तपासणीसाठी पोहोचलो होतो. हा परिसर माझ्या विधानसभा मतदारसंघात येतो. त्यामुळे मी माझं कर्तव्य बजावत होतो, असं अंकितनं अधिकाऱ्यांना सांगितलं. ढगळ गणवेश अंगावर चढवून आलेल्या तरुणाला पाहून अधिकाऱ्यांना संशय आला. त्याच्या कारवर लाल दिला होता. पण आता लाल-निळ्या दिव्याचं कल्चर संपल्याचा विसर त्याला पडला. पोलिसांनी अंकितला अटक केली आहे. त्याची कार जप्त करण्यात आली आहे.

अंकित ढगळ गणवेश घालून मतदान केंद्रावर पोहोचला होता. त्याच्या गणवेशावर तीन स्टार होते. त्याचे हावभाव, देहबोली पाहता तो अधिकारी वाटत नव्हता. त्याच्या हालचाली पाहून पोलिसांना संशय आला. त्यांनी अंकितला रोखलं. त्याच्याकडे ओळखपत्राची मागणी केली आणि अंकित पकडला गेला.