विद्यार्थी आंदोलन दिवसेंदिवस अधिकाधिक चिघळू लागले; अमेरिकेतील विद्यापीठांत तुंबळ पोलिसांची कारवाई सुरू

लॉस एंजेल्स: पॅलिस्टिनींच्या समर्थनार्थ अमेरिकेतील विद्यापीठांमध्ये सुरू असलेले विद्यार्थी आंदोलन दिवसेंदिवस अधिकाधिक चिघळू लागले आहे. लॉस एंजेल्समधील कॅलिफोर्निया विद्यापीठात पोलिसांनी शेकडो आंदोलकांना कॅम्पस सोडण्यास सांगूनही त्यांनी हा आदेश न जुमानल्याने अखेर पोलिसांनी गुरुवारी आंदोलकांच्या छावण्या उद्ध्वस्त केल्या. तत्पूर्वी इस्रायल समर्थकांनी पॅलिस्टिनी समर्थकांच्या छावण्यांचीही नासधूस केली होती.

आदल्या रात्री इस्रायल समर्थकांनी पॅलिस्टिनी समर्थकांच्या तंबूंवर हल्ला केला, पेपर स्प्रे फवारण्यात आले. इस्रायल समर्थक आणि पॅलिस्टिनी समर्थकांमधील संघर्ष थांबण्याचे नाव घेत नसल्याने अखेर विद्यापीठ प्रशासन आणि कॅम्पस पोलिसांनी विद्यार्थ्यांना हुसकावून लावण्याचा निर्णय घेतला. या संघर्षात किमान १५ आंदोलक जखमी झाले.

पोलिसांनी लाऊडस्पीकरवरून आंदोलकांना माघार घेण्याचे आवाहन करूनही तसेच, अटक करण्याचा इशारा देऊनही शेकडो विद्यार्थी कॅम्पसमध्ये जमले होते. काहींनी तिथेच छावण्यांमध्ये आश्रय घेतला होता. अखेर पोलिसांनी या छावण्या उद्ध्वस्त करून आंदोलकांची धरपकड केली. तिकडे न्यू हॅम्पशायरमध्ये डार्टमाऊथ कॉलेजमध्येही आंदोलकांच्या छावण्या हटवून सुमारे ९० जणांना अटक करण्यात आली. पोर्टलँड स्टेट विद्यापीठातही काही आंदोलकांनी तिथल्या ग्रंथालयाचा ताबा घेतला होता. त्यामुळे प्रशासनाने तिथेही पोलिसांना पाचारण केले. आतापर्यंत सुमारे ३० कॉलेजांमधून १६०० आंदोलक विद्यार्थ्यांना अटक करण्यात आली आहे.

विस्कॉन्सिन शाळेबाहेर पोलिसांकडून विद्यार्थी ठार

मॅडिसन येथील विस्कॉन्सिन शाळेत पोलिस आणि विद्यार्थी आंदोलकांमधील संघर्षाला रक्तरंजित वळण लागले. एका आंदोलकाकडे शस्त्र असल्याचा संशय आल्याने पोलिसांनी केलेल्या गोळीबारात एक विद्यार्थी ठार झाला. पोलिसांनी विद्यार्थी आंदोलकांच्या छावण्या हटवल्या. येथे आंदोलकांशी झालेल्या संघर्षात चार पोलिसही जखमी झाले.