माजी कॉंग्रेस नेत्या राधिका खेरा अन् अभिनेता शेखर सुमन भाजपमध्ये, विनोद तावडेंच्या उपस्थितीत पक्षप्रवेश

म. टा. विशेष प्रतिनिधी, नवी दिल्ली : काँग्रेसमधून पक्ष प्रवक्त्यांची गळती सुरूच असून, छत्तीसगडमधील राष्ट्रीय माध्यम समन्वयक राधिका खेरा यांनी मंगळवारी भाजपमध्ये प्रवेश केला. पक्षाचे महासचिव विनोद तावडे यांच्या मुख्य उपस्थितीत दिल्लीतील भाजप मुख्यालयात खेरा यांच्यासोबतच अभिनेते शेखर सुमन यांनीही भाजपमध्ये प्रवेश केला.

‘आजची काँग्रेस महात्मा गांधींची नाही, ती रामविरोधी, हिंदूविरोधी काँग्रेस आहे’, असा आरोप राधिका यांनी केला. खेरा यांनी छत्तीसगड काँग्रेसच्या संपर्क विभागाचे अध्यक्ष सुशील आनंद शुक्ला यांच्यावरील गंभीर आरोपांचा पुनरुच्चार केला. ‘शुक्ला यांनी मला मद्यपानासाठी बोलावले व रात्री माझ्या खोलीचा दरवाजा ठोठावला’, असा आरोप त्यांनी केला. ‘रामभक्तीपोटी मी रामलल्लाचे दर्शन घेतल्यावर कौसल्या मातेच्या भूमीवर माझ्याशी गैरवर्तन करण्यात आले’, असेही त्या म्हणाल्या.