Swati Maliwal Case: ‘आप’चा पाय खोलात; अरविंद केजरीवाल यांचे ‘ओएसडी’ विभव कुमार अटकेत

वृत्तसंस्था, नवी दिल्ली : आम आदमी पक्षाच्या खासदार स्वाती मालिवाल यांना मारहाण केल्याप्रकरणी दिल्लीचे मुख्यमंत्री अरविंद केजरीवाल यांचा विशेष कार्य अधिकारी विभव कुमार याला दिल्ली पोलिसांनी शनिवारी अटक केली. मालिवाल यांनी शुक्रवारी तीस हजारी न्यायालयात जबाब नोंदवल्याच्या पार्श्वभूमीवर पोलिसांनी ही कारवाई केली. मद्यधोरण गैरव्यवहारप्रकरणी ‘ईडी’ने केजरीवाल यांच्यासह ‘आप’ला आरोपी बनवले असताना मालिवाल प्रकरणातील या कारवाईमुळे पक्षाला मोठा धक्का बसल्याचे मानले जाते.अरविंद केजरीवाल यांची भेट घेण्यासाठी १३ मे रोजी त्यांच्या निवासस्थानी आले असता, विभव कुमारने कानशिलात लगावत छातीवर, पोटावर मारल्याचा आरोप स्वाती मालिवाल यांनी केला आहे. या प्रकरणी दिल्ली पोलिसांनी गुन्हा नोंदवून किमान दहा जणांचे जबाब नोंदवले. त्यात मुख्यमंत्री निवासस्थानावरील सुरक्षा कर्मचाऱ्यांसह अन्य कर्मचाऱ्यांचा समावेश आहे.

दुसरीकडे, मालिवाल यांनी मुख्यमंत्री निवासस्थानी बेकायदा प्रवेशासाठी सुरक्षाभंग करून गोंधळ घातला, अशी तक्रार विभव कुमारने शुक्रवारी दिल्ली पोलिसांत केली. मालिवाल यांना रोखण्याचा प्रयत्न केला असता, त्यांनी आपल्याला शिवीगाळ केल्याचा आरोपही विभव कुमारने केला. आपली तक्रार नोंदवून घेतल्यास मालिवाल यांच्या तक्रारीबाबत तपासात सहकार्य करण्यास तयार असल्याचेही विभव कुमारने दिल्ली पोलिसांना कळवले होते. अखेर शनिवारी सकाळी विभव कुमारला मुख्यमंत्री निवासस्थानातून अटक करण्यात आल्याचे दिल्लीच्या एका वरिष्ठ पोलिस अधिकाऱ्याने सांगितले. केजरीवाल यांना भेटण्यासाठी कुमार तिथे गेले असताना ही कारवाई करण्यात आली. विभव कुमारला अटक करण्यात आल्याने त्याचा अटकपूर्व जामीन अर्ज निरर्थक असल्याचे न्यायालयाने नमूद केले.

या कारवाईनंतर दिल्लीच्या मंत्री आतिषी यांनी पत्रकार परिषद घेऊन भाजपला लक्ष्य केले. या प्रकरणात पोलिसांची कारवाई निष्पक्ष असेल तर त्यांनी विभव कुमारचीही तक्रार नोंदवून घ्यायला हवी, असे आतिषी म्हणाल्या. ‘मालिवाल या मुख्यमंत्र्यांची वेळ न घेताच त्यांच्या निवासस्थानी गेल्या होत्या. त्या गेल्या तेव्हा केजरीवाल हे कामात व्यग्र होते’, असे आतिषी यांनी म्हटले आहे. विभव कुमारच्या अटकपूर्व जामीन अर्जावर सुनावणी होणार असतानाच पोलिसांनी अटकेची कारवाई केल्याचे आतिषी यांनी सांगितले.

‘बेकायदा भरतीप्रकरणी स्वाती मालिवाल यांच्याविरोधात गुन्हा दाखल करण्यात आला होता. या प्रकरणात त्यांना ‘ब्लॅकमेल’ करून भाजपने ‘आप’विरोधात कारस्थान रचले, असा आरोप ‘आप’च्या मंत्री आतिषी यांनी केला.
मद्यधोरण घोटाळ्यात केजरीवालांसह ‘आप’ही आरोपीच्या पिंजऱ्यात, ‘ईडी’ने आवळला कारवाईचा फास
‘अंगावर अनेक जखमा’

मालिवाल यांच्या डाव्या पायाला आणि उजव्या गालाला दुखापत झाल्याचे वैद्यकीय अहवालात म्हटले आहे. केजरीवाल यांच्या निवासस्थानावरील महिला सुरक्षा रक्षक मालिवाल यांचा हात धरून असल्याचे नव्या व्हिडीओमध्ये दिसत आहे. मालिवाल या आपला हात सोडवण्याचा प्रयत्न करत असल्याचे व्हिडीओमध्ये दिसते.

‘आम्हाला तुरुंगात टाका’

अरविंद केजरीवाल यांनी शनिवारी आक्रमक भूमिका घेतली. ‘मी पक्षाच्या कार्यकर्त्यांसह रविवारी भाजप कार्यालयात जाणार असून, पंतप्रधान नरेंद्र मोदी यांनी आमच्यापैकी कोणालाही तुरुंगात टाकावे’, असे आव्हान केजरीवाल यांनी दिले. मात्र, पक्षनेत्यांना तुरुंगात टाकले तरी पक्ष संपणार नाही, असा विश्वास केजरीवाल यांनी व्यक्त केला.