निवडणुकीच्या काळात सापडले ५३ कोटीचे घबाड; गादी, डब्बे आणि बॉक्समध्ये लपवले होते पैसे; एका चिठ्ठीवर चालायचा संपूर्ण व्यवहार

आग्रा: उत्तर प्रदेशातील आग्रा येथील बूट व्यापाऱ्यांच्या निवासस्थानी आयकर (आयटी) छापे टाकले. हे छापे ३ दिवस सुरू होते. आयकर विभागाला या छाप्यातून एकूण ५३ कोटी रुपयांची रोख रक्कम सापडली. व्यापाऱ्याने गादी, कुशन , बॉक्स आदीमध्ये पैसे लपवून ठेवले होते. या छाप्यानंतर आयकर विभागाला एक मोठी गोष्ट लक्षात आली की, संबंधित व्यापारी चिठ्ठीवर संपूर्ण व्यवसाय करायचा.जगभरात प्रसिद्ध असलेला आग्रातील चप्पल आणि बूटांचा व्यवसाय एकूण २० हजार कोटी रुपयांचा आहे. या व्यवसायात नोट देण्याच्या जागी एक चिठ्ठी दिली जाते. ज्याच्या माध्यमातून मोठे व्यवहार केले जातात. ज्या व्यापाऱ्याच्या निवासस्थानावर आयकर विभागाने छापे टाकले तो किरकोळ कमिशन घेऊन या चिठ्ठीच्या माध्यमातून कोट्यवधी रुपयांचे व्यवहार करायचा.

आग्रातील हा व्यवसाय उधारीवर अवलंबून आहे. व्यापारी आणि छोटे मोठे व्यवसाइक लगेच पैसे देण्या ऐवजी एक चिठ्ठी देतात ज्यावर पैसे आणि तारीख लिहली जाते. संबंधित चिठ्ठीवर लिहलेल्या तारखेला मोठ्या व्यापाऱ्याकडून छोट्या व्यापाऱ्याला पैसे दिले जातात. हा संपूर्ण व्यवहार दोन नंबरचा असतो. अशा व्यवहारात रोख रक्कम दाखवली जात नाही आणि मोठ्या प्रमाणात कर देखील द्यावा लागत नाही. चिठ्ठीच्या माध्यमातून १०० हून अधिक मोठे व्यापारी व्यवहार करतात. चिठ्ठीतून पैसे देण्याच्या बदल्यात ३ टक्के इतके व्याज घेतले जाते.
रश्मिकाच्या अटल सेतूच्या व्हिडिओवर आदित्य ठाकरेंचा पलटवार; नेटकरीही भडकले, म्हणाले- आतापर्यंत…

या छाप्यात आयकर विभागाला हरमिलाप ट्रेडर्सच्या मालकाच्या घरातून मोठ्या संख्येने चिठ्ठ्या मिळाल्या आहेत. यात २० हून अधिक व्यापाऱ्यांची नावे आहेत. लोकसभा निवडणुकीमुळे गेल्या महिन्याभरापासून व्यवहार झाला नव्हता.

आयकर विभागाच्या या कारवाईमुळे शहरातील अन्य व्यापाऱ्यांचे टेन्शन वाढले आहे. कारण छाप्यात जप्त करण्यात आलेल्या चिठ्ठ्यांमध्ये अन्य व्यापाऱ्यांचे व्यवहार आणि नावे आहेत. हरमिलाप ट्रेडर्सच्या मालकाकडून ज्यांना पैसे द्यायचे आहेत त्यांची अडचण वाढू शकते. सूत्रांनी दिलेल्या माहितीनुसार ५० कोटीहून अधिक रक्कमेचा हा व्यवहार असू शकतो. आयकर अधिकाऱ्यांनी हरमिलामसह एमजी रोडवर असलेल्या बीके शूज, धाकरन येथील मंशू फुटवेअर या ठिकाणी छापे टाकलेत.