Jaipur News : युवकाच्या पोटातून निघाला लोखंडाचा खजिना! तब्बल तीन तास शस्त्रक्रिया, नेमकं प्रकरण काय?

वृत्तसंस्था, जयपूर : जयपूरच्या सवाई मानसिंह रुग्णालयातील डॉक्टरांना एका युवकाच्या पोटातून मोठ्या प्रमाणावर लोखंडाच्या वस्तू बाहेर काढण्यात यश मिळाले आहे. मनोरुग्ण असलेला हा युवक मूळ हरियाणाचा रहिवासी असून त्याच्या पोटातून लोखंडी खिळे, किल्ली, सुया आणि नटबोल्ट काढण्यात आले.‘हरियाणाच्या रेवाडी येथील युवकाच्या पोटात प्रचंड वेदना होत असल्याने त्याचे कुटुंबीय त्याला जयपूर येथे घेऊन आले होते. हा युवक मनोरुग्ण आहे. त्याच्या पोटाचा एक्स-रे आणि सीटीस्कॅन केले त्यावेळी आम्हाला धक्काच बसला. त्याच्या पोटात जणूकाही लोखंडाचा खजिना असावा, अशीच आमची भावना झाली.

Pune News : पुणे विद्यापीठात सायबर सुरक्षा अभ्यासक्रम सुरू, ४०हून अधिक तज्ज्ञ मार्गदर्शन करणार

कारण त्याच्या पोटात लोखडी खिळे, सुया, नटबोल्ट आणि एक किल्लीसुद्धा दिसली. युवकाला लोखंडाच्या वस्तू खाण्याची सवय असल्याचे त्याच्या कुटुंबीयांनी सांगितले. या वस्तू काढण्यासाठी आम्ही शस्त्रक्रिया करण्याचा निर्णय घेतला,’ असे सवाई मानसिंह रुग्णालयाचे ज्येष्ठ प्राध्यापक आणि विभागप्रमुख डॉ. राजेंद्र मांडिया यांनी सांगितले.

तीन तास चालली शस्त्रक्रिया

डॉ. मांडिया यांच्यासह डॉ. सुभाष, डॉ. इशात कुमार साहू आणि डॉ. कार्तिक सैनी यांच्या पथकाने सुमारे तीन तास शस्त्रक्रिया करून युवकाच्या पोटातील लोखंडाच्या सर्व वस्तू बाहेर काढल्या. युवकाचे पोट न फाडता दुर्बिणीद्वारे ही शस्त्रक्रिया करण्यात आली. काही खिळे आतड्यापर्यंत पोहोचले होते. पोट फाडायचे नसल्याने ही शस्त्रक्रिया अत्यंत क्लिष्ट होती. मात्र, डॉक्टरांनी ती यशस्वीपणे पूर्ण केली. त्याच्या पोटातून १० खिळे, एक किल्ली, काही नाणी आणि नटबोल्ट काढण्यात आले. शस्त्रक्रियेनंतर युवकाची पोटदुखी थांबली असून त्याला बरे वाटल्यानंतर सुटी देण्यात आल्याचे डॉ. मांडिया यांनी सांगितले.