Fact Check : पंतप्रधान मोदींच्या सन्मानार्थ नितीन गडकरी उभे राहिले नाहीत? व्हायरल व्हिडिओचं सत्य काय?

नवी दिल्ली : भारतीय जनता पक्ष आपल्या मित्रपक्षांसोबत तिसऱ्यांदा सरकार स्थापन करणार आहे. यासंदर्भात दिल्लीत राष्ट्रीय लोकशाही आघाडीने संसदीय पक्षाची बैठक घेतली. या बैठकीला उपस्थित असलेले भाजप नेते नितीन गडकरी यांचा एक व्हिडिओ व्हायरल होत आहे. व्हिडिओ शेअर करत असा दावा केला जात आहे की, सर्वजण पंतप्रधान मोदींच्या स्वागतासाठी उभे राहिले. पण नितीन गडकरी बसून राहिले आणि त्यांच्या स्वागतासाठी सन्मानार्थ उभे राहिले नाहीत. काय आहे व्हिडिओमागचं सत्य?

विश्वास न्यूजने या व्हिडिओची पडताळणी केली असता, व्हायरल व्हिडिओमध्ये केला जाणारा दावा चुकीचा असल्याचं समोर आलं आहे. नितीन गडकरी पंतप्रधान मोदींच्या स्वागतासाठी एकदा नाही, तर अनेकदा उभे राहिले. त्यांनी त्यांच्यासाठी टाळ्याही वाजवल्या. अपप्रचार करण्याच्या उद्देशाने व्हिडिओ एडिट करुन तो खोट्या दाव्यासह शेअर केला जात आहे.

व्हायरल व्हिडिओमध्ये काय म्हटलंय?

फेसबुक युजर भूना दर्पणने ७ जून २०२४ रोजी व्हिडिओ शेअर करत गडकरीजी सन्मानासाठी उभे राहिले नाहीत, असं कॅप्शन लिहिलं होतं. अर्काइव पोस्ट

पडताळणीत काय समोर?

व्हायरल दाव्याचं सत्य जाणून घेण्यासाठी विश्वास न्यूजने संबंधित कीवर्डच्या मदतीने गुगलवर सर्च केलं. त्यावेळी पंतप्रधान मोदींच्या अधिकृत यूट्यूब चॅनेलवर या कार्यक्रमाचा व्हिडिओ (अर्काइव लिंक) आढळला. पूर्ण व्हिडिओ पाहिल्यानंतर आढळलं, की नितीन गडकरी पंतप्रधान मोदींच्या सन्मानार्थ एकदा नव्हे तर अनेक वेळा उभे राहिले. त्यांनी पंतप्रधान मोदींसाठी टाळ्याही वाजवल्या. व्हिडिओच्या सुरुवातीला २.१२ मिनिटांनी पंतप्रधान मोदी आत आल्यावर सर्वजण उभे राहून टाळ्या वाजवून त्यांचे स्वागत करत असल्याचं दिसलं.

व्हिडिओमध्ये ३.१९ मिनिटांनी, पंतप्रधान मोदी आत आल्यानंतर, भाजप अध्यक्ष जेपी नड्डा त्यांना शाल देऊन सत्कार करतात, तेव्हा ते हात जोडून सर्वांना अभिवादन करतात. यावेळी नितीन गडकरी खाली बसल्याचं दिसून येतं. पण ते पुन्हा उठतात आणि उभं राहून टाळ्या वाजवतात.
Fact Check : सर्व नेते मोदींपेक्षा चांगले… चंद्राबाबू नायडू यांचं पंतप्रधानांबाबत वक्तव्य? काय आहे व्हायरल व्हिडिओचं सत्य?
व्हायरल व्हिडिओमध्ये ५.१२ मिनिटांपासून पाहता येतं, की जेपी नड्डा भाषण करताना आणि पंतप्रधान मोदींचे स्वागत करताना व्हिडिओमध्ये दिसत आहे. पंतप्रधान मोदींनी पुन्हा एकदा जनतेला शुभेच्छा दिल्या. तेव्हा तिथे उपस्थित लोक त्यांच्या सन्मानार्थ उभे राहतात. व्हिडिओमध्ये २४.४३ मिनिटांनी जेपी नड्डा भाषण देण्यासाठी येतात आणि पंतप्रधान मोदींचे आभार मानतात आणि त्यांच्या समर्थनार्थ भाषण देतात.

व्हिडीओमध्ये ५८.५१ मिनिटांनी पंतप्रधान मोदींना भाषणासाठी बोलावले जाते आणि त्यांना पुष्पहार घालून सन्मानित केलं जातं, हे व्हिडिओमध्ये दिसत आहे. त्या वेळीही नितीन गडकरी उठून टाळ्या वाजवतात. १ तास २६ सेकंदात जेव्हा ते भाषण देण्यासाठी येतात तेव्हा ते उभे राहतात हे दिसून येतं. अखेर २.१३.२३ मिनिटांनी त्यांचं भाषण संपल्यावर नितीन गडकरी यांनीही उभे राहून टाळ्या वाजवल्या.

तपासात असं सिद्ध झालं, की नितीन गडकरी पंतप्रधान मोदींच्या सन्मानार्थ एकदा नव्हे तर अनेक वेळा उभे राहिले आणि टाळ्या वाजवल्या. अधिक माहितीसाठी आम्ही भाजपचे प्रवक्ते डॉ विजय सोनकर शास्त्री यांच्याशी संपर्क साधला. त्यांनी व्हायरल झालेला व्हिडिओ खोटा असल्याचं म्हटलं आहे.

निष्कर्ष

विश्वास न्यूजने केलेल्या त्यांच्या तपासात असं आढळून आलं की, नितीन गडकरी पंतप्रधान मोदींना आदर देण्यासाठी, त्यांच्या सन्मानार्थ एकदा नव्हे, तर अनेक वेळा उभे राहिले. त्याच्यासाठी टाळ्याही वाजवल्या. अपप्रचार करण्याच्या उद्देशाने व्हिडिओ एडिट करुन तो खोट्या दाव्यासह शेअर केला जात आहे.

(This story was originally published by Vishvas News, and republished by MT as part of the Shakti Collective.)