यंदा लोकसभेत दोन डझन मुस्लिम बांधव विजयी; २०१९च्या तुलनेत २ जागांची घट, कोणत्या पक्षात सर्वाधिक उमेदवार?

वृत्तसंस्था, नवी दिल्ली : देशाच्या अठराव्या लोकसभेत मुस्लिम समाजाचे दोन डझन म्हणजे एकूण २४ उमेदवार विजयी झाले आहेत. यात सर्वाधिक सात जण काँग्रेसचे तर तृणमूल काँग्रेस आणि समाजवादी पक्ष (सप) यांचे अनुक्रमे पाच आणि चार सदस्य आहेत.

केंद्रीय निवडणूक आयोगाने जाहीर केलेल्या ताज्या निकालानुसार, लोकसभेच्या एकूण ५४३ पैकी २४ जागांवर मुस्लिम उमेदवार निवडून आले. लोकसभा निवडणुकीसाठी एकूण ७८ उमेदवार रिंगणात होते. यातील २४ जण जिंकले. गेल्या लोकसभेच्या तुलनेत ही संख्या दोनने कमी झाली आहे.

आसाममधील धुबरी येथील काँग्रेसचे रकिबुल हुसेन यांनी तब्बल दहा लाखांपेक्षा अधिक मते मिळविली. त्यांनी आसाममधील ऑल इंडिया युनायटेड डेमोक्रॅटिक फ्रंटचे (एआययूडीएफ) बद्रुद्दीन अजमल यांना पराभूत केले. उत्तर प्रदेशात सहारणपूर येथे काँग्रेसचे इम्रान मसूद, तर कैराना येथे ‘सप’च्या युवा नेत्या इकरा चौधरी विजयी झाल्या. गाझिपूर येथे ‘सप’चे अफजल अन्सारी यांनी भाजपचे पारसनाथ राय यांनी आस्मान दाखविले. रामपूर येथे ‘सप’चे मोहिब्बुल्लाह तर संभल येथे झिया उर रेहमान विजयी झाले.

पश्चिम बंगालमध्ये ‘तृणमूल’चे बहरामपूर येथे माजी क्रिकेटपटू युसूफ पठाण यांनी काँग्रेसचे अधीर रंजन चौधरी यांना पराभूत केले. ‘तृणमूल’तर्फे बसिरहाट येथे हाजी नुरूल इस्लाम, उलुबेरिया येथे सजदा अहमद, जंगीपूर येथे खलिलूर रेहमान आणि मुर्शिदाबाद येथे अबू ताहेर खान विजयी झाले. केंद्रशासित प्रदेश लक्षद्वीपमध्ये काँग्रेसचे मुहम्मद हमदुल्लाह जिंकले. त्यांनी इंडिया आघाडीतीलच राष्ट्रवादी काँग्रेसचे (शरद पवार) खासदार मोहम्मद फैजल यांना हरविले.

इंडियन युनियन मुस्लिम लीगच्या (आययूएमएल) मुस्लिम उमेदवारांनी तामिळनाडू आणि केरळ या दोन राज्यात यश मिळविले. तामिळनाडूतील रामानंदपूरम येथे नवास्कानी के. यांनी, तर केरळमधील पोन्नानी आणि मलप्पुरम येथे अनुक्रमे डॉ. एम. पी. अब्दुस्सामद सामादानी आणि ई. टी. मोहम्मद बशीर विजयी झाले. केरळमधील वदकारा येथे काँग्रेसचे शफी पारांबिल यांनी ‘माकप’विरोधात यश मिळविले. तेलंगाणमधील हैदराबाद येथील लक्षवेधी लढतीत ‘एमआयएम’चे अध्यक्ष असदुद्दीन ओवैसी पाचव्यांदा विजयी झाले. त्यांच्याविरोधात भाजपतर्फे डॉ. माधवी लता होत्या.

काश्मीर, लडाखमध्ये अपक्षांना संधी

जम्मू-काश्मीर या केंद्रशासित प्रदेशातील बारामुल्ला येथे अपक्ष उमेदवार अब्दुल्ल रशिद शेख ऊर्फ इंजिनीअर रशिद हे विजयी झाले. कलम ३७० हटविल्यानंतर काश्मीरपासून वेगळ्या झालेल्या लडाख मतदारसंघात अपक्ष असलेले मोहम्मद हानीफ विजयी झाले. लडाखमध्ये भाजपने विद्यमान खासदाराला संधी नाकारत नवीन उमेदवार दिला होता. नॅशनल कॉन्फरन्सचे (एनसी) मिआन अलताफ अहमद हे अनंतनाग राजौरी येथून तर सय्यद रुहुल्लाह मेहदी हे श्रीनगरमधून विजयी झाले.
West Bengal : काँग्रेस-डावे ठरले ‘वोट कटवा’; आघाडीमुळे १८ जागांवर भाजपचे नुकसान, तृणमूलचीही आठ जागांवर बिघाडी
मुस्लिम उमेदवार विजयाचा लेखाजोखा
२०२४—-२४
२०१९—-२६
२०१४—-२३

पक्षनिहाय विजयी उमेदवार

काँग्रेस—७
तृणमूल—५
सप—–४
आययूएमएल—३
एनसी—२
अपक्ष—२
एमआयएम—१

– बहुजन समाज पक्षाचे सर्वाधिक ३५ मुस्लिम उमेदवार रिंगणात
– काँग्रेसकडून १९ तर ‘तृणमूल’कडून सहा जणांना संधी
– ‘सप’च्या चारपैकी उत्तर प्रदेशातील तिघांच्या गळ्यात विजयमाला
– काश्मीर वगळता उत्तर प्रदेशात सर्वाधिक २२ मुस्लिम उमेदवार
– पश्चिम बंगालमध्ये १७, बिहारमध्ये सात, तर केरळमध्ये सहा जण