देशाच्या अठ्ठावीस केंद्रीय मंत्र्यांविरोधात क्रिमिनल केस; ADRचा धक्कादायक अहवाल, कोणत्या मंत्र्यांवर गंभीर गुन्हे?

वृत्तसंस्था, नवी दिल्ली : नव्यानेच शपथविधी झालेल्या केंद्र सरकारमधील २८ मंत्र्यांविरोधात विविध प्रकारचे गुन्हे दाखल आहेत. त्यातील १९ जणांविरोधात खुनाचा प्रयत्न, महिलांविरोधातील गुन्हे, विखारी भाषणे अशा स्वरूपाचे गंभीर गुन्हे दाखल आहेत, असे असोसिएशन फॉर डेमोक्रॅटिक रिसर्च (एडीआर) या संस्थेने म्हटले आहे.

ज्या मंत्र्यांवर गंभीर आरोप आहेत, त्यातील दोघांनी आपल्यावर खुनाच्या प्रयत्नाचा (भारतीय दंड संहितेच्या कलम ३०७ अंतर्गत) गुन्हा दाखल आहे, असे जाहीर केले आहे. बंदरे, जहाज वाहतूक आणि जलवाहतूक राज्यमंत्री शंतनू ठाकूर आणि शिक्षण आणि ईशान्य भारत विकास खात्याचे राज्यमंत्री सुकांता मुजुमदार अशी या मंत्र्यांची नावे आहेत.

गृह राज्यमंत्री बंडी संजयकुमार, शंतनू ठाकूर, सुकांता मुजुमदार, तेल आणि नैसर्गिक वायू राज्यमंत्री सुरेश गोपी आणि आदिवासी कल्याण राज्यमंत्री ज्युएल ओराम यांच्या विरोधात महिलांविरोधातील गुन्ह्यांप्रकरणी आरोप आहेत. याखेरीज आठ मंत्र्यांविरोधात विखारी भाषणे केल्याबद्दल गुन्हे दाखल आहेत. केंद्रीय मंत्रिमंडळात एकूण ७१ मंत्री असून, त्यातील २८ जणांनी म्हणजे ३९ टक्के मंत्र्यांनी आपल्याविरोधात फौजदारी गुन्हे दाखल असल्याचे प्रतिज्ञापत्रात जाहीर केले आहे, असे ‘एडीआर’च्या अहवालात म्हटले आहे.
नवनिर्वाचित २५१ खासदारांवर क्रिमिनल केस; ADRचा धक्कादायक अहवाल, सर्वाधिक महिला खासदार भाजपच्याच
७१
एकूण केंद्रीय मंत्री

२८
फौजदारी गुन्हे दाखल असलेले

३९ टक्के
गुन्हे दाखल असलेल्यांचे एकूण मंत्रिमंडळातील प्रमाण

९९ टक्के मंत्री करोडपती
केंद्रीय मंत्रिमंडळातील ७१ मंत्र्यांपैकी ९९ टक्के म्हणजे ७० मंत्री करोडपती आहेत. मंत्र्यांची सरासरी संपत्ती १०७ कोटी रुपये आहे, असे ‘एडीआर’च्या अहवालात म्हटले आहे.
नव्या संसदेत बसणार साक्षात धनकुबेर; ९३ टक्के खासदार कोट्यधीश, जाणून घ्या टॉप-३मध्ये कोण?
सर्वांत श्रीमंत मंत्री (कोटी रुपयांत)
डॉ. चंद्रशेखर पेम्मासनी (ग्रामीण विकास, दूरसंचार राज्यमंत्री) ५७०५.४७
ज्योतिरादित्य शिंदे (दूरसंचार आणि ईशान्य भारत विकासमंत्री) ४२४.७५ कोटी रुपये
एच. डी. कुमारस्वामी (अवजड उद्योग आणि पोलादमंत्री) २१७.०३
अश्विनी वैष्णव (रेल्वेमंत्री) १४४.१२
राव इंद्रजित सिंह (सांख्यिकी, योजना अंमलबजावणी राज्यमंत्री) १२१.५४
पीयूष गोयल (वाणिज्यमंत्री) ११०.९५ कोटी

बहुतांश केंद्रीय मंत्री उच्चशिक्षित

केंद्रीय मंत्रिमंडळातील ५७ मंत्री पदवीधर किंवा त्यापेक्षा उच्च शिक्षण घेतलेले आहेत आणि ११ मंत्र्यांचे शिक्षणबारावीपर्यंत झाले आहे, असे ‘एडीआर’च्या अहवालात म्हटले आहे.

पदविकाधारक – ३
पदवीधर – १४
व्यावसायिक पदवीधर – १०
पदव्युत्तर पदवीधारक – २६
डॉक्टरेट – ७