२८ वर्षीय भारतीय तरुणाला कॅनडामध्ये गोळ्या घालून संपवलं; टार्गेट किलिंगचा संशय, चार जणांना अटक

वृत्तसंस्था, ओटावा : कॅनडातील ब्रिटिश कोलंबिया प्रांतात एका २८ वर्षीय भारतीय वंशाच्या तरुणाची गोळ्या झाडून हत्या करण्यात आल्याची माहिती पोलिसांनी दिली. ही हत्या ठरवून केल्याचा संशय असून, पोलिसांनी चौघांना अटक करून त्यांच्यावर खुनाचा गुन्हा दाखल केला आहे.

काय प्रकरण?

मृत तरुणाचे नाव युवराज गोयल असल्याचे पोलिसांनी सांगितले. शुक्रवारी सकाळी सरे येथे गोळीबार झाल्याची माहिती मिळाल्यानंतर रॉयल कॅनेडियन माउंटेड पोलिस घटनास्थळी पोहोचले असता त्यांना युवराजचा मृतदेह तिथे आढळून आला. सरे येथे कार विकणाऱ्या शोरूममध्ये युवराज काम करायचा, असे वृत्त ‘ग्लोबल न्यूज’ने युवराजची बहीण चारू सिंघला यांच्या हवाल्याने दिले आहे. युवराजची हत्या का करण्यात आली याविषयी कुटुंबाला काहीच माहिती नाही. त्याचे संघटित गुन्हेगारीशी संबंध असल्याचे कोणतेही संकेत नसल्याचेही चारू यांनी सांगितले. युवराजचे मेव्हणे बावनदीप यांनी सांगितले, की हत्या होण्यापूर्वी युवराज भारतात राहणाऱ्या त्याच्या आईशी फोनवर बोलत होता. ‘नेहमीप्रमाणे तो जिममधून परत आला आणि कारमधून उतरताच त्याच्यावर गोळ्या झाडण्यात आल्या,’ अशी माहिती बावनदीप यांनी दिली.

धक्कादायक! पुण्यातील बिल्डरने संपवलं जीवन, खिशात सापडली चिठ्ठी, बांधकाम क्षेत्रात खळबळ
सीबीसी न्यूजने दिलेल्या वृत्तानुसार, पोलिसांनी गोळीबारानंतर लगेचच चार संशयितांना अटक केली. त्यामध्ये सरे येथील मनवीर बसरा (२३), साहिब बसरा (२०), हरकिरत झुट्टी (२३) आणि ओंटारियो येथील केलोन फ्रँकोइस (२०) यांचा समावेश आहे. त्यांच्यावर हत्येचा गुन्हा दाखल करण्यात आला आहे. प्राथमिक पुराव्यांवरून असे सूचित होत आहे की, ही हत्या ठरवून केली असावी. मात्र, हत्येमागील नेमके कारण पोलिस शोधत आहेत.