Kuwait Fire: जिथे वडील राबले, तिथेच लेकाचा अंत; कुवेत अग्निकांडातील हृदयद्रावक कहाणी

नवी दिल्ली: कुवेतमध्ये बुधवारी सकाळी एका इमारतीला लागलेल्या आगीत ४९ जणांचा मृत्यू झाला तर ३० जण जखमी झाले आहेत. मिळालेल्या माहितीनुसार, मृतांमध्ये ४० भारतीयांचा समावेश आहे. ज्यांची ओळख पटू शकली त्यापैकी बहुतेक जण हे केरळचे रहिवासी होते. मृतांमध्ये अनेक तरुणांचाही समावेश आहे. यामध्ये २७ वर्षीय श्रीहरी प्रदीप यांचाही मृत्यू झाला आहे.

गेल्याच आठवड्यात २७ वर्षीय श्रीहरी प्रदीपने त्याच कंपनीत आपली पहिली नोकरी सुरु केली, ज्या कंपनीत त्याचे वडील गेल्या एका दशकापासून काम करत आहेत. प्रदीप केरळचा असून तो मेकॅनिकल इंजिनीअर होता. श्रीहरी पाच दिवसांपूर्वीच कंपनीत रुजू झाला होता.

केरळ सरकारने दिलेल्या माहितीनुसार, या अग्निकांडात मृत्यूमुखी पडलेल्या ४९ लोकांपैकी ४० भारतीय होते आणि त्यापैकी २४ केरळचे होते. श्रीहरीचे वडील प्रदीप हे ज्या इमारतीला आग लागली तिथून तीन इमारत लांब राहत होते आणि त्यांनी गुरुवारी सकाळी हॉस्पिटलच्या शवागारात आपल्या मुलाची ओळख पटवली. बुधवारी केरळमधील कोट्टायम जिल्ह्यातील इतिथानममध्ये त्याचे कुटुंबीय प्रार्थना करत होते की श्रीहरी हा सुखरुप सापडावा. पण, त्यांच्या सर्व प्रार्थना व्यर्थ गेल्या.

जेव्हा ही घटना घडली तेव्हा श्रीहरीचे वडील प्रदीप हे त्या अपार्टमेंटमध्ये पोहोचले. मात्र, सुरक्षा कर्मचाऱ्यांनी त्यांना आत जाऊ दिले नाही. तेव्हा त्यांना कळालं की श्रीहरी जखमी झाला आहे आणि त्याला रुग्णालयात नेण्यात आले आहे. त्यानंतर प्रदीप आपल्या मुलाच्या शोधात बुधवारी दिवसभर एका हॉस्पिटलमधून दुसऱ्या हॉस्पिटलमध्ये धावत होते. अखेर रुग्णालयातील एका कर्मचाऱ्याने श्रीहरीची ओळख आणि त्याच्या दोन्ही मनगटावर असलेले टॅटू शोधून काढले. यानंतर कर्मचारी प्रदीपला शवागारात घेऊन गेले, तेथे त्यांनी मुलाचा मृतदेह ओळखला. श्रीहरी हा होरपळला नव्हता तर धुरामुळे गुदमरल्याने त्याचा मृत्यू झाला होता.

प्रदीपने जवळपास एक दशक NBTC साठी काम केले आणि त्यांच्या पत्नी दीपा गृहिणी आहे. श्रीहरीशिवाय प्रदीपला आणखी दोन मुले आहेत.