Giorgia Meloni : भारतात मोदी, तर इटलीत मुस्लिमांना जॉर्जिया मेलोनी यांचं नाव घेऊन भीती दाखवली जाते

मुंबई : मुस्लीम संस्कृतीला युरोपात बिलकुल जागा नाही, असं विधान करुन वातावरण पेटवलेल्या जॉर्जिया मेलोनी इटलीच्या पंतप्रधान झाल्या खऱ्या, पण त्यानंतर इटलीत जे मुसलमान राहतात त्यांच्यात भीतीचं वातावरण तयार झालं आहे. त्याची कारणंही तशीच होती. मोदींसोबतच्या केमिस्ट्रीमुळे चर्चेत असलेल्या जॉर्जिया मेलोनी उजव्या विचारांमुळे जगभरात प्रसिद्ध तर आहेतच, पण २०२२ च्या निवडणुकीत जाहीरपणे कट्टर मुस्लीमविरोध बोलून दाखवला आणि एकहाती सत्ताही मिळवली.

बार टेंडर म्हणून काम केलेली एक तरुणी उजव्या विचारांच्या आधारावर विद्यार्थी दशेतच नेता बनली, पुढे इस्लामविरोधावर रान पेटवलं, देशाची सत्ता मिळवली आणि त्यानंतरही जगात आणि विशेषतः भारतात जी ओळख मिळवली त्यामुळे इटलीची चर्चा प्रत्येक व्यासपीठावर होऊ लागली. मोदी आणि मेलोनी यांच्या विचारांची केमिस्ट्री कशी जुळते, दोन्ही नेते एवढे जवळचे का मानले जातात, भारतात मोदींच्या नावाने मुस्लिमांना जशी भीती दाखवली जाते तशीच भीती इटलीतही मेलोनींच्या नावाची का दाखवली जाते?

मेलोनी यांचं मुस्लीम संस्कृतीबाबत विधान काय होतं?

१८ डिसेंबर २०२३ रोजी जॉर्जिया मेलोनी यांनी एक विधान केलं, ज्याने जगभरात त्यांच्यावर टीका झाली. युरोपात मुस्लीम संस्कृतीला जागा नाही, असं हे विधान होतं. बाजूला बसलेले ब्रिटनचे पंतप्रधान ऋषी सुनक यांनीही याला दुजोरा दिला आणि आगीत तेल ओतलं, पण मेलोनी मात्र त्यांच्या वक्तव्यावर ठाम राहिल्या. ऑक्टोबर २०२२ मध्ये जॉर्जिया मेलोनी सत्तेत आल्या आणि इटलीतले मुस्लीम अस्वस्थ झाले. भारतात २०१४ ला मोदींच्या नावाने मुस्लिमांमध्ये जे भीतीचं वातावरण विरोधकांनी तयार केलं, त्याचीच पुनरावृत्ती इटलीत झाली आणि आंतरराष्ट्रीय मीडियातही हे चित्र दिसलं.

जॉर्जिया मेलोनी आणि इस्लाम वाद काय?

विद्यार्थीदशेपासूनच मेलोनी कट्टर उजव्या विचारांच्या समर्थक आहेत. इटलीत ख्रिश्चन धर्माप्रमाणे मुस्लीम धर्माला अजून घटनात्मक मान्यता नाही. इटलीत मुस्लिमांची लोकसंख्या जवळपास ४ टक्के एवढी आहे. धर्माला मान्यता नसल्यामुळे मशीदी आणि धार्मिक कार्यक्रमांसाठी कोणताच शासकीय निधी मिळत नाही. मान्यतेमुळे मुस्लीम विवाह बेकायदेशीर, मुस्लीम सणांना कर्मचाऱ्यांना सुट्टी नसते.

इटलीच्या घटनेत सर्वांना धार्मिक स्वातंत्र्य, मात्र कॅथोलिक चर्चला विशेष स्थान आहे. इतर धर्मांना विशेष मान मिळवण्यासाठी इंटेसा म्हणजेच एक मान्यता मिळवावी लागते. मुस्लीम धर्माकडून साल २००० पासून या मान्यतेसाठी प्रयत्न सुरू आहेत, मात्र शासकीय स्तरावर मान्यता मिळाली नाही.

मेलोनी या स्वतः उजव्या विचारांच्या असल्यामुळे मोदी आणि त्यांचे विचार जुळतात आणि जागतिक व्यासपिठावर या दोन नेत्यांची केमिस्ट्री सर्वांनीच पाहिली. इंटरनेटवर तर या दोघांचे अनेक मीम्सही व्हायरल होतात. पण या विचारांच्या मागे आहे उजवी विचारधारा.

जॉर्जिया मेलोनी कोण आहेत?

वयाच्या १५ व्या वर्षीच मेलोनी विद्यार्थी दशेपासून राजकारणात सक्रिय झाल्या. इटालियन सामाजिक चळवळ या पक्षाच्या विद्यार्थी आघाडीत त्यांनी काम केलं.
त्यांनी स्वतः द अॅन्सेस्टर्स या विद्यार्थी संघटनेची स्थापना केली, त्यांना शैक्षणिक सुधारणांना कडाडून विरोध झाला. १९९६ मध्ये राष्ट्रीय आघाडीच्या विद्यार्थी विंगचा राष्ट्रीय चेहरा म्हणून त्यांनी ओळख मिळवली.

सामान्य कुटुंबाची पार्श्वभूमी असलेल्या मेलोनी यांनी पत्रकार, वेटर, बार टेंडर म्हणूनही काम केलं. २००८ ला वयाच्या ३१ व्या वर्षी त्यांची युवा मंत्री म्हणून नियुक्ती झाली. तिबेट मुद्द्यावर चीनचा निषेध म्हणून २००८ ला बीजिंग ऑलिम्पिकवर बहिष्कार टाकण्याचं आवाहन त्यांनी केलं. २०१२ ला ब्रदर्स ऑफ इटली ही नवीन राजकीय चळवळ सुरू केली, सुरुवातीला त्यांना अपयश आलं.

हेही वाचा – Giorgia Meloni : नाइट क्लबमध्ये बार टेंडर, सिंगल मदर ते लोकप्रिय PM; मेलोनी यांच्या सौंदर्यापुढे अभिनेत्रीही फिक्या

करोना काळात केलेल्या कामाचा निवडणुकीत फायदा

कोविड काळात इटलीत हाहाःकार माजला होता. या काळात मेलोनी यांच्या पक्षाने लोकांमध्ये जाऊन मदत केली होती. या मदतीमुळे मेलोनी यांचा पक्ष लोकांमध्ये पोहोचला, त्याचा फायदा त्यांना निवडणुकीत झाला. ऑक्टोबर २०२२ मध्ये मेलोनी यांना सर्वाधिक जागा मिळाल्या आणि इटलीच्या पहिल्या महिला पंतप्रधान होण्याचा मान त्यांनी मिळवला.

जी ७ परिषद

जी ७ परिषदेच्या निमित्ताने भारताला सदस्य नसूनही मेलोनी यांनी विशेष निमंत्रण दिलं आणि पंतप्रधान मोदींनी हजेरी लावली. फ्रान्सचे राष्ट्राध्यक्ष इमॅन्युएल मॅक्रोन आणि मेलोडी यांच्यातील वादामुळे ही परिषद चर्चेत आली असली, तरी अजून एका मुद्द्याची चर्चा होती ती म्हणजे पंतप्रधान मोदी आणि मेलोनी यांच्या रिलची.