आधी उचलबांगडी, आता बनवलं उत्तराधिकारी; दीड महिन्यात आकाश आनंद मॅच्युअर? बसपात चाललंय काय?

वृत्तसंस्था, लखनऊ : बहुजन समाज पक्षाच्या (बसप) सर्वेसर्वा मायावती यांनी दीड महिन्यानंतर आपला निर्णय बदलून रविवारी पक्षाच्या राष्ट्रीय समन्वयकपदाची जबाबदारी त्यांचा पुतण्या आकाश आनंद यांच्याकडे सोपवली आहे. तसेच पुन्हा आनंद यांनाच आपला उत्तराधिकारी म्हणून घोषित केले आहे. यापूर्वी ७ मे रोजी लोकसभा निवडणुकीच्या तोंडावर त्यांनी आकाश आनंद यांना अपरिपक्व असल्याचे सांगून समन्वयकपदाच्या जबाबदारीतून मुक्त केले होते.

आकाश आनंद यांना पुन्हा संधी

पक्षप्रमुख मायावती यांनी रविवारी येथील बसप प्रदेश कार्यालयात राष्ट्रीय स्तरावरील बैठकीचे आयोजन केले होते. यात केंद्रीय पदाधिकाऱ्यांसह प्रदेशाध्यक्ष आणि विविध राज्यांचे वरिष्ठ पदाधिकारी सहभागी झाले होते. लोकसभा निवडणुकीत पक्षाच्या दारुण पराभवानंतर प्रथमच झालेल्या या बैठकीत अनेक मुद्द्यांचा सखोल आढावा घेण्यात आला. बैठकीनंतर पक्षाने एक निवेदनही प्रसिद्ध केले असून, यामध्ये ‘बसपच्या राष्ट्रीय अध्यक्ष मायावती यांनी आकाश आनंद यांना पक्षाच्या राष्ट्रीय समन्वयकपदाची काम करण्याची पुन्हा संधी दिली आहे. पूर्वीप्रमाणेच ते पक्षातील सर्व पदे सांभाळतील. तसेच ते मायावती यांचे एकमेव उत्तराधिकारीही राहतील,’ असे सांगण्यात आले आहे.

Pune News: विधानसभेसाठी शरद पवार अॅक्शन मोडमध्ये; जागावाटपावर मोठं विधान, नेमकं काय म्हणाले?
काय आहे इतिहास?

मायावती यांनी गेल्या वर्षी डिसेंबरमध्ये आकाश आनंद यांना आपला उत्तराधिकारी म्हणून घोषित केले होते. मात्र, लोकसभा निवडणुकीदरम्यान ७ मे रोजी त्यांनी आपला निर्णय बदलून आकाश आनंद यांना उत्तराधिकारी आणि पक्षाच्या राष्ट्रीय समन्वयक या जबाबदारीतून पुन्हा मुक्त केले होते. यामुळे अनेकांनी आश्चर्य व्यक्त केले होते. आता पुन्हा दीड महिन्याने त्यांनी आपला निर्णय बदलून आकाश आनंद यांना आपला उत्तराधिकारी घोषित केले आहे. लोकसभा निवडणुकीत एकट्याने लढलेल्या ‘बसप’ला राज्यातील एकही जागा जिंकता आली नाही.