लग्नासाठी पार्लरमध्ये मेकअप करत होती, तेवढ्यात ‘तो’ आला, चल म्हणाला; तिचा नकार अन् सारं संपलं

झाशी: वरात यायच्या काहीच तासांपूर्वी असं काही घडलं की लग्नघरावर शोककळा पसरली. झाशी येथे लग्नासाठी तयार व्हायसाठी पार्लरमध्ये गेलेल्या नवरीला एका तरुणाने गोळ्या झाडल्या. गोळी लागल्यानंतर रुग्णालयात उपचार घेत असताना तिचा मृत्यू झाला. झाशीच्या केसीपरी बाजार येथील ब्युटी पार्लरमध्ये ही भयंकर घटना घडली. पोलिसांनी घटनास्थळी पोहोचून तपासाला सुरुवात केली असून, नवरीचा मृतदेह शवविच्छेदनासाठी पाठवला आहे. सध्या पोलिस आरोपीचा शोध घेत आहेत.

गोळी मारण्यापूर्वी या तरुणाने नवरीला आपल्यासोबत चलण्यास सांगितलं होतं. जेव्हा तिने सोबत जायला नकार दिला तेव्हा बंदूक काढली आणि थेट तिच्या छातीत गोळी घातली. त्यानंतर तो तिथून फरार झाला. घटनेची माहिती कळताच लग्न मांडवात एकच आक्रोश झाला.

पार्लरमध्ये मेकअपसाठी गेली होती काजल

मध्य प्रदेशातील दतिया जिल्ह्यातील काजलचं लग्न झाशीच्या सिमथरी येथील राजसोबत ठरलं होतं. काजलच्या लग्नाची सारी तयारी झाली होती. वऱ्हाड्यांच्या स्वागताची तयारी सुरु होती. तर काजल ही मेकअप करण्यासाठी पार्लरमध्ये गेली होती. तिच्यासोबत तिच्या मैत्रिणी आणि बहीण नेहा देखील होती. तिचा मेकअप जवळपास पूर्ण झालेला होत.
Crime News: सौदीवरुन एक ईमेल, पोलिसांचा तपास अन् घराच्या अंगणात असं काही सापडलं की सारेच हादरले

तू मला धोका दिला अन् काजलच्या छातीत गोळी झाडली

तिथे तोंडावर रुमाल बांधून तिचा प्रियकर दीपक पोहोचला. तो म्हणाला काजल बाहेर ये, तू मला धोका दिला. हे ऐकताच काजलने बाहेर येण्यास नकार दिला. त्याने काजलला आपल्यासोबत येण्यास सांगितलं. तिने नकार देताच त्याने पार्लरच्या दाराची काच फोडली आणि जबरदस्ती आत प्रवेश केला. त्यानंतर त्याने तिच्यावर गोळी झाडली आणि तेथून पळून गेला.

गोळी झाडल्याचा आवाज येताच परिसरात एकच गोंधळ माजला. रक्ताने माखलेल्या काजलला रुग्णालयात नेण्यात आले. मात्र, तिथे उपचारादरम्यान तिचा मृत्यू झाला.

आरोपीला पकडण्यासाठी पोलिसांचा दोन पथकं

पोलिसांनी दिलेल्या माहितीनुसार, सीपरी बाजार येथे एका तरुणीला गोळी लागल्याची माहिती मिळाली, उपचारादरम्यान तिचा मृत्यू झाला. गोळी झाडणाऱ्या तरुणाची काजलशी ओळख होती. तो तिच्या मागे इथपर्यंत आला होता आणि मग त्याने तिच्यावर गोळी झाडली. त्याला अटक करण्यासाठी दोन पथकं तयार करण्यात आले आहेत.