Asaduddin Owaisi: ‘या पोकळ धमक्या…,पॅलेस्टाईनच्या घोषणेवरुन विरोधकांना ओवेसींचे प्रत्युत्तर

हैदराबाद : लोकसभेचे पुनर्नियुक्त खासदार AIMIM प्रमुख असदुद्दीन ओवेसी यांनी मंगळवारी आपल्या शपथविधीदरम्यान दिलेल्या घोषणेने वातावरण चांगलेच तापलेले आहे. लोकसभेच्या विशेष सत्रामध्ये लोकसभेचे हंगामी अध्यक्ष भार्तुहरी मेहताब हे गेल्या दोन दिवसांपासून सदस्यांना शपथ देत होते. यादरम्यान असदुद्दीन ओवेसी यांनी आपल्या शपथविधीनंतर इजराईल-पॅलेस्टाईन मध्ये चाललेल्या युद्धादरम्यान ‘जय प‌ॅलेस्टाईनची’ घोषणा देवून पॅलेस्टाईनबद्दल सहानुभूती व्यक्त केली. ओवेसींनी दिलेल्या घोषणेनंतर सभागृहातील सत्ताधारी पक्षाच्या सदस्यांनी या घोषणेला विरोध केला. त्यांचे या घोषणेचे पडसाद सभागृहाबाहेरही उमटत आहेत. त्यात आता पुन्हा ओवेसींनी विरोधकांना प्रत्युत्तर दिले आहे.

अनेक भाजप नेत्यांनी ओवेसींच्या या घोषणेचा विरोध करुन त्यांना सभागृहातून बेदखल करण्याची मागणी केली आहे. भाजप आमदार नितेश राने यांनी तर पॅलेस्टाईनचा जयघोष करणाऱ्या ओवेसींची जीभ छाटणाऱ्यास पारितोषिक जाहीर केले आहे.
“पॅलेस्टाईनच्या घोषणा देणाऱ्या ओवैसीची जीभ छाटा, पारितोषिक घेवून जा” नितेश राणेंचे विधान

अशी कोणतीही तरतुद संविधानात नाही

विरोधकांच्या आरोपांना आणि धमक्यांना बॅरिस्टर असलेले असदुद्दीन ओवेसी यांनी पुन्हा प्रत्युत्तर दिले आहे. यावेळी ते म्हणाले की, ‘त्यांना काय करायचे आहे ते करू द्या. मी सुध्दा थोडेफार संविधान जाणतो. त्यामूळे या पोकळ धमक्या माझ्यावर चालत नाहीत.’ आपल्या घोषणेचे समर्थन करताना ओवेसी यापूर्वी म्हणाले होते की, मी दिलेल्या घोषणा निषेधार्ह्य आहे अशी कोणतीही तरतुद भारतीय संविधानात नाही. तसेच त्यांनी पॅलेस्टाईन बद्दलच्या आपल्या मताचे समर्थन करताना महात्मा गांधींच्या पॅलेस्टाईनबद्दलच्या मताचा संदर्भ दिला होता.

शपथविधीवेळी नेमकं काय घडलं ?

आपल्या हैदराबाद मतदारसंघातून पाच वेळा प्रतिनिधित्व करणाऱ्या ओवेसीनी मंगळवारी आपल्या शपथविधीसाठी अध्यक्षांच्या आसनाकडे आले. त्यावेळी भाजपच्या काही सदस्यांनी ‘जय श्री राम,व भारत माता की जय’ चे नारे दिले. यानंतर ओवेसी शपथविधीसाठी उभे राहीले. शपथविधी झाल्यानंतर त्यांनी जय भीम, जय मीम, जय तेलंगाना, जय पॅलेस्टाईन’ अशी घोषणा दिली. त्यानंतर या वादाला तोंड फुटले. मंगळवारी झालेल्या त्यांच्या या शपथविधीनंतर भाजपचे मध्यप्रदेशचे आमदार छत्रपाल सिंग गंगवार यांनी जय हिंदूराष्ट्राची घोषणा दिली होती.

भाजप आयटीसेलचे प्रमुख अमित मालवीय यांनीही ओवेसींनी भारतीय संविधानाचं उल्लंघन केल्याने त्यांना अपात्र करण्याची मागणी केली आहे. भारतीय संविधानाच्या अनुच्छेद १०२ अन्वये लोकसभा सदस्य असलेल्या ओवेसींनी पॅलेस्टाईन या परकीय राष्ट्राबद्दल सहानुभूती दाखविल्यामुळे त्याचे सदस्यत्व रद्द केले जावे अशी मागणी मालवीय यांनी केली आहे.