दोन आठवड्यांपूर्वी नोकरीवर, विद्यापीठातच प्रोफेसर भयानक परिस्थितीत आढळली, नेमकं काय घडलं?

मुरादाबाद: उत्तर प्रदेशातील मुरादाबाद येथे एका खासगी विद्यापीठात २७ वर्षीय महिला सहाय्यक प्रोफेसरचा मृतदेह सापडल्यान एकच खळबळ माजली आहे. या तरुणीच्या गळ्यावर चाकूने वार केल्याच्या खुणा होत्या. स्थानिक पोलिसांनी सांगितल्याप्रमाणे याला सध्या आत्महत्येचं प्रकरण मानलं जात आहे. सध्या मृतदेह ताब्यात घेण्यात आला असून शवविच्छेदनासाठी पाठवण्यात आला आहे. पुढील तपास सुरु आहे.

याप्रकरणी मुरादाबाद पोलिस अधीक्षक अखिलेश यांनी दिलेल्या माहितीनुसार, ही घटना सोमवारी घडली आहे. दिल्ली रोड येथील तीर्थंकर महावीर विद्यापीठाच्या पॅथोलॉजी विभागाच्या सहाय्यक प्राध्यापिका डॉ. अदिती मेहरोत्राचा मृतदेह गेस्ट हाऊसच्या एका खोलीत आढळून आला आहे. घटनेची माहिती मिळताच पोलिस घटनास्थळी दाखल झाली आमि मृतदेह ताब्यात घेतला. अदिती मेहरोत्राच्या गळ्यावर चाकूच्या खुणा होत्या.

प्राथमिक तपासानुसार प्रकरण आत्महत्येच

तिचा मृतदेह शवविच्छेदनासाठी पाठवण्यात आला असून तिच्या कुटुंबियांना याबाबतची माहिती देण्यात आली आहे. सुरुवातीच्या तपासात हे प्रकरण आत्महत्येचं दिसत आहे, पण मृत्यूचं खरं कारण हे शवविच्छेदनाच्या अहवालानंतरच समोर येईल. फोरेंसिक टीम पुरावे गोळा करत आहेत. सध्या पोलिस या प्रकरणाचा तपास करत आहेत.

१५ दिवसांपूर्वी नोकरीवर लागलेली अदिती

हरियाणाच्या रेवाडी येथे राहणारी अदिती मेहरोत्रा याच वर्षी १६ जूलला या विद्यापीठात नोकरीला लागली होती. तेव्हापासून ती विद्यापीठाच्या आवारातील गेस्ट हाऊसमध्ये राहत होती. पण, आता अवघ्या दोन आठवड्यात तिचा मृतदेह सापडल्याने एकच खळबळ माजली आहे.

मुलीच्या मृत्यूची बातमी कळताच कुटुंबीयांनी एकच टाहो फोडला. तिचं कुटुंब मुरादाबाद येथे पोहोचलं आहे. तिचे वडील डॉ. नवनीत मेहरोत्रा यांनी सांगितलं की, घटनेच्या रात्री त्यांनी तिला फोन केला होता तेव्हा तिने फोन घेतला आणि परत फोन केला पण नाही. ती फोन घेत नसल्याने या घटनेचा उलगडा झाला. तिच्या खोलीचं दार बंद असल्याचंही तपासात समोर आलं आहे. पोलिस या प्रकरणी तपास करत आहेत.