Allahabad High Court: धर्मांतरासाठीच्या धार्मिक सभा तातडीने थांबवा! अलाहाबाद उच्च न्यायालयाचे आदेश

वृत्तसंस्था, प्रयागराज : ‘ज्या धार्मिक स्थळांमध्ये धर्मांतरासाठी सभा होतात, त्या तातडीने थांबवाव्यात. अन्यथा देशातील बहुसंख्य लोकसंख्या एक दिवस अल्पसंख्य होईल’, असे निरीक्षण अलाहाबाद उच्च न्यायालयाने नोंदवले. प्रयागराजजवळील एका गावात अनेक नागरिकांच्या धर्मांतरात सहभागी असल्याचा आरोप असलेल्या आरोपीचा जामीन अर्ज फेटाळताना न्यायमूर्ती रोहित राजन अग्रवाल यांनी हे निरीक्षण नोंदवले.

‘प्रसार या शब्दाचा अर्थ प्रचार करणे असा आहे. परंतु त्याचा अर्थ एखाद्या व्यक्तीचे धर्मांतर करणे असा नाही. या तातडीच्या प्रकरणात माहिती देणाऱ्याने अर्जदारावर गंभीर आरोप केले आहेत. तिच्या भावासह इतर अनेकांना त्यांच्या गावातून नवी दिल्लीतील मेळाव्यात सहभागी होण्यासाठी नेण्यात आले आणि त्यांनी ख्रिश्चन धर्म स्वीकारला. माहिती देणाऱ्या व्यक्तीचा भाऊ परतलाच नाही’, याकडे न्यायालयाने लक्ष वेधले. ‘अशा पद्धतीने धर्मांतर होत राहिले, तर या देशातील बहुसंख्य लोकसंख्या एक दिवस अल्पसंख्य होईल. त्यामुळे धर्मांतरासाठी होणाऱ्या सभा धार्मिक मंडळांनी त्वरित थांबवायला हव्यात’, असे न्यायालयाने म्हटले. ‘तपास अधिकाऱ्याने नोंदवलेल्या जबाबावरून स्पष्टपणे दिसून येते आहे की, आरोपी कैलास नागरिकांना नवी दिल्लीतील धार्मिक मंडळांमध्ये सहभागी होण्यासाठी घेऊन जात होता. तिथे त्यांचे ख्रिश्चन धर्मात धर्मांतर होत होते’, असे सोमवारी दिलेल्या आपल्या आदेशात न्यायालयाने म्हटले.

‘संपूर्ण उत्तर प्रदेशात अनुसूचित जाती, जमाती आणि आर्थिकदृष्ट्या गरीब व्यक्तींसह इतर जातींना ख्रिश्चन धर्मात धर्मांतरित करण्याचे बेकायदा उद्योग मोठ्या प्रमाणात केले जात आहेत. या न्यायालयाला प्रथमदर्शनी असे आढळून आले की, अर्जदाराला जामीन मिळण्याचा अधिकार नाही. त्यामुळे या प्रकरणातील गुन्ह्यात सहभागी असलेल्या अर्जदाराचा जामीन अर्ज फेटाळण्यात आला आहे’, असे न्यायालयाने म्हटले आहे.
Hindutva : आंबेडकर का म्हणाले – मी हिंदू म्हणून मरणार नाही, हिंदू-हिंदुत्वाची संपूर्ण कहाणी जाणून घ्या.
आरोपी कैलासविरुद्ध हमीरपूर जिल्ह्यातील मौदाहा पोलिस ठाण्यामध्ये गुन्हा दाखल करण्यात आला होता. माहिती देणाऱ्या रामकली प्रजापतीचा भाऊ रामफल याला एका सामाजिक मेळाव्यात सहभागी होण्यासाठी कैलास यांनी दिल्लीला नेले होते. गावातील इतर अनेकांनाही अशा मेळाव्यात नेण्यात आले आणि त्यांचे ख्रिश्चन धर्मात धर्मांतर करण्यात आले.