पुणेकरांनो सांभाळा! परिस्थिती आणखी भीषण होण्याची शक्यता, खडकवासलातून आणखी पाणी सोडणार

पुणे: पुण्यात रात्रीपासून पावसाने धुमाकुळ घातला आहे. सततच्या पावसामुळे पुण्यातील अनेक भागात पाणी साचलं आहे. त्यातच खडकवाला धरणाचं पाणी सोडल्याने परिसरात छातीपर्यंत पाणी भरलं आहे. त्यामुळे लोकांना होडीच्या मदतीने बाहेर काढलं जात आहे. त्यामुळे नागरिकांचे मोठे हाल होत आहेत. तर, पुण्यात येत्या काही तासात अतिमुसळधार पावसाचा इशारा देण्यात आला आहे.

खडकवासला धरणाच्या सांडव्यावरून मुठा नदी पात्रामध्ये ४०००० क्युसेक्स वेगाने पाण्याचा विसर्ग सुरु आहे. त्यामुळे मुठा नदीला पूर येऊन डेक्कन, सिंहगड रोड, एकता नगर, पूलाची वाडी या भागात पाणी शिरलं. अचानक पाणी वाढल्याने नागरिक घरातच अडकून पडले. आता त्यांना होडीच्या मदतीने बाहेर काढलं जात आहे.
Pune Rain: पावसाच्या पाण्यातून अंडाभुर्जीची गाडी वाचवण्याचा प्रयत्न, पुण्यात शॉक लागून तीन तरुणांचा मृत्यू

पाण्याचा विसर्ग आणखी वाढणार

छातीपर्यंत पाणी साचलं आहे, जर विसर्ग असाच सुरु राहिला तर परिस्थिती अजून भीषण होऊ शकते. म्हणून पुणे महापालिकेने जलसंपदा विभागाला पाण्याचा विसर्ग कमी करण्याची विनंती केली. पण, शहरात मुसळधार पाऊस कोसळतो आहे, त्यामुळे पाण्याचा विसर्ग कमी करण्याऐवजी तो आणखी वाढवावा लागेल असं जलसंपदा विभागाने सांगितल्याची माहिती आहे. त्यामुळे पुण्यातील परिस्थिती आणखी भीषण होण्याची भीती आहे.

हवामान विभागाने येत्या काही तासात पुणे शहर आणि घाट क्षेत्रात मुसळधार पावसाचा इशारा दिला असल्याने भोर, वेल्हा, मावळ, मुळशी, हवेली तालुक्यातील खडकवासला परिसर आणि पुणे शहरातील शाळा २५ जुलै रोजी बंद ठेवण्याचे आदेश जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष डॉ. सुहास दिवसे यांनी दिले. खडकवासला धरणातून ४० हजार क्यूसेक विसर्ग सुरू होत आहे. तसेच, पुणे शहराच्या सखल भागात पाणी साचण्याची शक्यता आहे. त्यामुळे नागरिकांनी दक्षता बाळगावी आणि आवश्यकता असेल तरच घराबाहेर पडावे असे आवाहन जिल्हाधिकारी डॉ.दिवसे यांनी केले आहे.

शाळा-कार्यालयांना सुट्टी जाहीर

पुणे, पिंपरी चिंचवड, भोर, वेल्हा, मावळ, मुळशी, खेड, जुन्नर, आंबेगाव, खेड जुन्नर आंबेगावमध्ये फक्त घाटमाथ्यावरच्या शाळा बंद या भागातील शाळेचा समावेश असणार आहे. तसेच, पुण्यातील सर्व कार्यालयांनाही सुट्टी जाहीर करण्यात आली आहे. पुणे शहरात तसेच उपनगर भागात झाल्याले अति मुसळधार पावसामुळे जणजीवन विस्कळीत झालं आहे, काही ठिकाणी झाड पडल्याची घटना घडली आहे तर काही ठिकाणी सोसायटी आणि घरात पाणी शिरल्याची घटना घडली आहे.

सद्यस्थितीत अग्निशमन दलाचे अधिकारी व जवान कार्यरत असून पाणी शिरलेल्या घटनास्थळी अडकलेल्या नागरिकांना धीर देत त्यांना सुरक्षितस्थळी हलविण्याचं काम करत आहेत. तर, भवानी पेठ, गुळ आळी, वटेश्वर भुवन येथे मोठे झाड पडल्याने रस्ता वाहतुकीसाठी बंद झाला असून झाडाखाली काही वाहने अडकली आहेत. त्यांच्यामदतीसाठी अग्निशमन दल दाखल झाले आहे.

अजित पवार अ‍ॅक्शन मोडमध्ये

पुणे शहर व जिल्ह्यातील अतिवृष्टीच्या परिस्थितीचा उपमुख्यमंत्री आणि पुण्याचे पालकमंत्री अजित पवार यांनी आढावा घेतला. त्यांनी जिल्हा प्रशासन आणि आपत्ती निवारण यंत्रणेला बचाव व मदत कार्यासाठी सतर्क राहण्याचे आवाहन केले. आज सकाळीच जिल्हाधिकारी सुहास दिवसे यांच्याशी फोनवरून चर्चा करून जिल्ह्यातील पूरपरिस्थिती तसेच बचाव व मदतकार्याच्या तयारीचा आढावा घेतला. आपत्ती निवारण यंत्रणेने सतर्क राहुन नागरिकांना तात्काळ मदत पोहोचवण्याच्या सूचना देण्यात आल्या आहेत. तसेच, महत्त्वाच्या कारणांशिवाय घराबाहेर पडणे टाळण्याचे आवाहन प्रशासनाकडून करण्यात आले आहे.