उरण हत्याकांडातील मुख्य आरोपीला अटक, कर्नाटकातून दाऊद शेखच्या मुसक्या आवळल्या

शिल्पा नरवडे, नवी मुंबई : उरणमधील तरुणीच्या हत्याकांड प्रकरणात मोठी घडामोड घडली आहे. आरोपी दाऊद शेख याला कर्नाटकातील गुलबर्गा जिल्ह्यातील शाहपूर येथून ताब्यात घेण्यात आले आहे. आधी दाऊदच्या संपर्कात असलेल्या मोहसीन नामक तरुणाला कर्नाटक येथून ताब्यात घेण्यात आल्याचं वृत्त समोर आलं होतं. त्यानंतर नवी मुंबई पोलीस मुख्य आरोपीलाही पकडणार का, याकडे सर्वांचं लक्ष होतं. धक्कादायक म्हणजे मोहसीन आणि दाऊद हे एकच आहेत का, असा सवालही विचारला जात होता.

हत्येच्या दिवशी म्हणजे २५ जुलै रोजी मोहसीनचाच तरुणीसोबत शेवटचा संपर्क झाल्याची माहिती समोर येत होती. कॉल डिटेल्सच्या आधारे पोलिसांनी कारवाई केली. मुख्य आरोपी दाऊद शेख कर्नाटकात लपून बसल्याचं पोलिसांना समजलं होतं.

हत्येच्या दिवशीचे नवी मुंबईतील घटनास्थळाजवळचे सीसीटीव्ही फुटेजही समोर आले आहे. यात २ वाजून १२ मिनिटांनी ज्या मार्गावरुन तरुणी गेली, तिथूनच फक्त दहा मिनिटांनी आरोपीही चालत गेल्याचे सीसीटीव्ही कॅमेरात कैद झाले आहे.

संबंधित तरुणीची छेड काढल्यामुळे आरोपीवर २०१९ मध्ये पॉस्को अंतर्गत गुन्हा दाखल करण्यात आला होता. त्याला अटक देखील करण्यात आली होती. मात्र सुटल्यानंतर आरोपीने पुन्हा तिच्याशी संपर्क केला असल्याचे समजते. त्यातून ही घटना घडल्याचा अंदाज आहे.
Milind More : धक्का लागल्याने वाद, रिक्षाचालकाची साथीदारांसह मारहाण, ठाकरेंच्या जखमी शिलेदाराचा हार्ट अटॅकने मृत्यू
तरुणीचा मृतदेह २६ तारखेला सकाळी उरणमधील एका पेट्रोल पंपाजवळ सापडला होता. त्यानंतर तिच्या आई वडिलांनी दाऊदवर आरोप केले. तिच्या शरीरावर अत्यंत निर्घृणपणे वार केले होते, प्रायव्हेट पार्ट चिरडण्यात आले होते, तर कुत्र्यांनी तिच्या शरीराचे लचके तोडले होते.

सध्या नवी मुंबई पोलिसांच्या तीन ते चार टीम आरोपीला शोधण्यासाठी रवाना झाल्या आहेत. आरोपीला लवकरात लवकर पकडण्यासाठी नवी मुंबई पोलिसांचे जलद गतीने तपासकार्य सुरु आहे.

दुसरीकडे, घटना होऊन तीन ते चार दिवस होऊन गेले, तरी आरोपी पकडला जात नाही, असा प्रश्न पीडित मुलीच्या कुटुंबासह नागरिक विचारत आहेत. या घटनेने संपूर्ण उरण शहरामध्ये संतापाची लाट उसळली पाहायला मिळत आहे.