पोलिसांची दहशत नाही, हे पुरुष थांबणार नाहीत, फाशी द्या, शर्मिला ठाकरेंचा संताप

नवी मुंबई : नवी मुंबईतील महिलेवर झालेला अत्याचार, उरणमधील तरुणीची झालेली हत्या आणि उलवेमधील तरुणीवर झालेला अत्याचार यासंदर्भात महाराष्ट्र नवनिर्माण सेनेचे अध्यक्ष राज ठाकरे यांच्या पत्नी शर्मिला ठाकरे यांनी नवी मुंबई पोलीस आयुक्त मिलिंद भारांबे यांची आज भेट घेतली. या तिन्ही घटनांबद्दल शर्मिला यांनी आयुक्तांकडे संताप व्यक्त केला. राज्यातील महिलांच्या सुरक्षेची जबाबदारी पोलिसांची आहे. अशा प्रकरणात कोणताही राजकीय पक्ष पोर्श कारसारखा हस्तक्षेप करत नाही. मग पोलिसांची दहशत का दिसत नाही? असा सवाल त्यांनी उपस्थित केला. तसेच शक्ती कायदा मंजूर करून त्याच्या अंमलबजावणीसाठी मनसे केंद्राकडे पाठपुरावा करेल, असेही शर्मिला ठाकरे यांनी सांगितले.

शर्मिला ठाकरे काय म्हणाल्या?

आम्ही पोलिसांवर प्रचंड नाराज आहोत. आताच मुलीच्या नकाराला चिडून तिच्यावर हल्ला झाल्याची घटना ऐकली. पोलिसांना अशा केसेसमध्ये कुठलाही राजकीय पक्ष अडवणार नाही. सर्व मुलींच्या रक्षणाची जबाबदारी पोलिसांवर आहे. निर्भया केस आपण ऐकली होती, पण इथे किती हिंस्रपणा… ज्या मुलाला एवढी विकृती आहे, मग तो कुठल्याही वयाचा का असेना, त्याला आयुष्यभर आतमध्ये ठेवलं पाहिजे, मी तर म्हणेन फाशीची शिक्षाच दिली पाहिजे, असं शर्मिला ठाकरे म्हणाल्या.
Uran Murder Case: दाऊदने तिची हत्या कशी केली? घटनाक्रम, कारण अन्… पोलिसांची संतापजनक माहिती

तोपर्यंत हे पुरुष थांबणार नाहीत

मंदिरात पुजारी जर असं करत असतील, मुलींशी लग्न करुन त्यांना फसवून असं करत असतील, तर यांच्यावर पोलिसांची दहशत असली पाहिजे, पोलीस काय करु शकतात, हे या पुरुषांना कळलं पाहिजे, आणि जोपर्यंत हे कळत नाही, तोपर्यंत हे पुरुष थांबणार नाहीत, असा संतापही शर्मिला ठाकरे यांनी व्यक्त केला.

शक्ती कायदा दहा महिन्यांपासून अंमलबजावणीस आला नाही. आमची पंतप्रधानांना विनंती आहे की एका वर्षात तो पास करा आणि अंमलबजावणी होतेय का ते पहा. असे गुन्हे झाले की दोन महिन्यात त्याला फाशीच दिली पाहिजे, हायकोर्ट-सुप्रीम कोर्ट-राष्ट्रपती असा कुठेही वाव नको, शिक्षा झालीच पाहिजे, असेही त्या म्हणाल्या.
Uran Murder Case : ठरवून भेटले, वाद झाला आणि… उरण हत्या प्रकरणी पोलिसांची माहिती, सूडबुद्धीने तरुणीचा खून?
मंदिरात झालेली केस लाजिरवाणी आहे. अशा पुरुषांना धर्म नसतो. धर्मनिरपेक्ष अशी तात्काळ शिक्षा व्हावी, तो कुठल्याही धर्माचा असो. लव्ह जिहाद केलं म्हणजे त्याला मारायचं आणि पुजाऱ्याने केलं म्हणून त्याला सोडायचं असं नाही, त्याला तितकीच शिक्षा झाली पाहिजे.