Tej Police Times
मुख्यमंत्र्यांच्या ठाण्यात उद्धव ठाकरेंची तोफ धडाडणार, विधानसभेचा शंखनाद होणार
विनित जांगळे, ठाणे : छत्रपती संभाजीनगर आणि पुण्यातील शिवसंकल्प अभियानानंतर आता शिवसेना पक्षप्रमख उद्धव ठाकरे यांची तोफ शनिवारी १० ऑगस्ट रोजी ठाण्यात धडाडणार आहे. भगवा सप्ताहानिमित्त शिवसेनेचा भव्य मेळावा गडकरी रंगायतन येथे होणार असून या मेळाव्याला उद्धव ठाकरे मार्गदर्शन करणार आहेत.
युवासेना प्रमुख, आमदार आदित्य ठाकरे आणि शिवसेना नेते-खासदार संजय राऊत हेही यावेळी उपस्थित राहणार आहेत. यावेळी उद्धव ठाकरे भाजप आणि मुख्यमंत्री एकनाथ शिंदे यांच्या शिवसेनेवर कशा पद्धतीने शरसंधान साधतात हे पाहावे लागणार आहे.
ठाणे लोकसभा मतदारसंघात शिवसेना ठाकरे गटाचा पराभव झाल्यानंतर पक्षप्रमुख उद्धव ठाकरे यांचा हा पहिलाच जाहीर ठाणे दौरा आहे. शिवसेनेचा भगवा सप्ताह सुरू असून ठाणे शहरासह जिल्ह्यात शिवसैनिकांचे झंझावाती सामाजिक उपक्रम सुरू आहेत. या सप्ताहानिमित्त शिवसैनिकांचा भव्य मेळावा शनिवारी गडकरी रंगायतन येथे होणार असून उद्धव ठाकरे मार्गदर्शन करण्यासाठी उपस्थित राहणार आहेत.
Shivsena UBT: जागावाटपाआधीच उमेदवारी; नाशकात ठाकरे गटाकडून दोन उमेदवार जाहीर, ‘मविआ’त ठिणगी पडणार?
छत्रपती संभाजीनगर आणि पुण्यातील शिवसंकल्प मेळाव्यात उद्धव ठाकरे यांनी विरोधकांवर टीकास्त्र सोडले. त्यानंतर दिल्ली दौऱ्यावर गेलेल्या उद्धव ठाकरे यांनी विविध पक्षांतील नेत्यांच्या गाठीभेटी घेऊन प्रदीर्घ चर्चा केली. त्यानंतर उद्धव ठाकरे शनिवारी ठाण्यात येणार असून त्यांच्या या मेळाव्यात ते काय बोलणार, विरोधकांचा कसा समाचार घेतात याची चर्चा राजकीय वर्तुळात सुरू झाली आहे. या मेळाव्याची तयारी शिवसेना नेते, माजी खासदार राजन विचारे व ठाणे जिल्हाप्रमुख केदार दिघे यांच्या मार्गदर्शनाखाली शिवसैनिकांनी केली आहे.
राजकीय पक्षांची विधानसभेची तयारी
लोकसभा निवडणुका आटोपल्यानंतर महाविकास आघाडीसह महायुतीचे घटक पक्ष आता विधानसभा निवडणुकांच्या कामाला लागले आहेत. भाजपने जिल्हानिहाय प्रभारींच्या नियुक्त्या करीत, बैठकांवर जोर दिला आहे. तर अजित पवार गटाकडून प्रदेशाध्यक्ष सुनील तटकरे यांची जनसंवाद यात्रा जिल्ह्यात येऊन गेली. शिवसेना शिंदे गटाकडूनही विधानसभानिहाय प्रभारी आणि निरीक्षक नियुक्त करण्यात आले आहेत. तर, राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनीही राज्यातील मतदारसंघाचे दौरे सुरू केले आहेत. काँग्रेसने इच्छुकांकडून अर्ज मागवले आहेत. त्यापाठोपाठ आता निवडणुकांच्या पार्श्वभूमीवर ठाकरे गटाकडून भगवा सप्ताहाचे आयोजन करण्यात आले आहे.