इंदूरमधून तरुणी धुळ्यात जळालेल्या अवस्थेत, आधार कार्डमुळे ओळख पटली; तरुणीसोबत काय घडलं?

धुळे : नगाव शिवारातील एका शेतात २४ वर्षीय तरुणी अर्धवट जळालेल्या अवस्थेत आढळून आली आहे. या घटनेची माहिती मिळताच पश्चिम देवपूर पोलीस ठाण्याचे पोलीस अधिकारी आणि कर्मचाऱ्यांनी घटनास्थळी धाव घेतली होती. तिच्याकडील बॅगेत आढळलेल्या आधारकार्डवरुन तिची ओळख पटली आहे.

तरुणी गंभीर भाजलेल्या स्थितीत, आधार कार्डवरुन ओळख पटली

मिळालेल्या माहितीनुसार, मंगळवारी सकाळी नगाव गावानजिक विश्रांती हॉटेलच्या पाठीमागे एक तरुणी गंभीर भाजलेल्या अवस्थेत आढळून आली. यावेळी तरुणीचा मोबाईल वाजत होता. स्थानिकांनी तिचा मोबाईल उचलून तिच्या कुटुंबियांना घडलेल्या घटनेची कल्पना दिली. शिवाय याबाबत ११२ द्वारे पोलिसांनाही माहिती कळवली. त्यानंतर देवपूर पश्चिम आणि देवपूर पोलीस त्वरीत घटनास्थळी पोहचले. त्यांनी सदर तरुणीची पाहणी केली असता ती अर्धवट जळालेल्या अवस्थेत दिसून आली. जवळपास ८० टक्के ती भाजली होती आणि आधार कार्डमुळे तिची ओळख पटली.
Crime News : पार्सल घेण्यासाठी आला, पोलिसांनी मुसक्या आवळल्या; उल्हासनगरमध्ये आंतरराष्ट्रीय टोळीचा पर्दाफाश, काय घडलं?
तसंच त्या ठिकाणी मृत तरुणीचा मोबाईल, बॅग आणि एका प्लास्टिकच्या बरणीत ज्वलनशील पदार्थ आढळून आला. पोलिसांनी तिच्या बॅगची तपासणी केली असता त्यात मृत तरुणीचे आधारकार्ड आढळून आले. आधार कार्डमुळे तरुणीची ओळख पटण्यास मदत झाली. तरुणीचं नाव रक्षिता महेश पाटीदार (२४) असून ती इंदूर (म. प्र.) येथील सुदामा नगरातील रहिवासी असल्याचं समोर आलं आहे. तरुणी ८० टक्क्यांहून अधिक जळाली होती.

तरुणीने टोकाचं पाऊल का उचललं?

यावेळी पीएसआय मनोज कचरे, पोहवा मनोहर पिंपळे, पोकॉ वाल्मिक पाटील, सुनिल राठोड उपस्थित होते. पोलिसांनी तिला उपचारासाठी तात्काळ श्री भाऊसाहेब हिरे वैद्यकीय शासकीय महाविद्यालय आणि सर्वोपचार रुग्णालयात दाखल केलं. मात्र डॉक्टरांनी तिला मृत घोषित केलं. दरम्यान, मृत तरुणीचे पालक आल्यानंतरच अधिकची माहिती कळू शकणार आहे. तिच्या कुटुंबियांना तरुणीची माहिती देण्यात आली असून त्या तरुणीने टोकाची भूमिका का घेतली हे अद्याप समोर आलं नाही. याप्रकरणी पोलीस अधिक तपास करत आहेत.