बारामतीत अजितदादांचा इंटरेस्ट संपला? रोहित पवारांचं नव्या मतदारसंघाबाबत भाकित

पुणे : लोकसभेनंतर आता विधानसभेचे वारे वाहू लागले आहे. यातच महाराष्ट्राचे लक्ष असलेल्या बारामती मतदार संघामधून अजित पवार हे निवडणूक न लढवता माझ्या विरुद्ध निवडणूक लढू शकतात असा दावा रोहित पवार यांनी केला आहे. पुण्यातील पत्रकार परिषदेत रोहित पवार म्हणाले की, “महायुती सरकारच्या विरोधात माझ्यासारखा कार्यकर्ता बोलतोय. त्यामुळे माझ्या मतदारसंघामध्ये महायुतीकडून खूप मोठी ताकद लावली जाणार आहे. यामध्ये माझ्याच मतदारसंघातील काही नेत्यांना मतं खाण्यासाठी उभे केले जाऊ शकते. तसेच जो प्रयोग लोकसभेमध्ये सुप्रिया ताईंच्या बाबतीत अजितदादांना करावा लागला, किंबहुना त्यांनी तो केला. माझ्या मतदारसंघामध्ये विधानसभेमध्ये सुद्धा त्यांच्यावर दबाव आणून माझ्याविरोधात लढण्याचे सूचवू शकतात. अजितदादा माझ्याविरोधात विधानसभेला उमेदवार असू शकतात”.

लाडकी बहीण योजनेचे पैसे अजूनही खात्यात आले नाही? यादीत तुमचे नाव नाही ना? जाणून घ्या मोठी अपडेट
रोहित पवार यांच्या म्हणण्यानुसार कर्जत जामखेड मतदारसंघामध्ये अजित पवार विरुद्ध रोहित पवार यांच्या लढतीची चर्चा असतानाच बारामती विधानसभेत तरुण चेहरा किंवा युवा उमेदवार म्हणून जय पवार यांना संधी दिली जाईल का? असा प्रश्न पत्रकारांनी अजित पवार यांना विचारला असता, अजित पवार म्हणाले ठीक आहे देऊया, शेवटी लोकशाही आहे. मला तर बारामतीत काही इंट्रेस्ट नाही, मी सात आठ वेळा निवडणुका लढलो आहे. जनता आणि कार्यकर्त्यांचा जयला तिकीट द्यावे असे म्हणणे असेल तर पार्लमेंटरी बोर्डात त्याचा विचार केला जाईल. पार्लमेंटरी बोर्ड आणि बारामतीमधील कार्यकर्ते जी काही मागणी करतील, ते करायला आम्ही तयार आहोत, असे म्हणत बारामतीतून जय पवार लढण्याचे सूतोवाच अजित पवार यांनी केले.

बारामती मतदारसंघात युगेंद्र पवार हे विधानसभेची तयारी करत आहेत. तर रोहित पवार हे कर्जत जामखेड मतदार संघाचे आमदार आहेत. त्यामुळे विधानसभेला अजित पवार नेमके कोणत्या पुतण्याविरुद्ध निवडणूक लढवणार हे मात्र गुपित ठेवले आहे. राष्ट्रवादी फुटीनंतर अजित दादा यांचे दोन्ही पुतणे शरद पवार यांच्यासोबत आहेत.